Read NQAARIIT NE ROOG A kim a tedu ke 32 Bible Online

A kim a tedu ke 32 - NQAARIIT NE ROOG bible

A kim a tedu ke 32

¹A cangtax alaa gimeena yoo, a fog na ke Dawid. Oxe Roog a waasanna njofaƭar um, a uup pakaad um, a ɗaaya.

²Ndaw o ɗaay no xe o Yaal oxe a ɗeeteerna tooñ um, too nqooƭ nof refee no ten.

³Feek mexe tiimtaa tooñ es, doole es kaa bugko wañooxaa soom, um iinaa ñaal oo ñaal.

⁴Ñaal fo yeng o ɓay of kaa iroox’u took es. Doole cer es kaa naag’u tak nen a teƥ a yenu na sumaan ale no ƈiid. A maaf

⁵Feeñlaaxoong pakaad es too ɗasniroong tooñ es. Layaam ee: «Xam waasnoox o Yaal oxe njofaƭar es», too waasanaxamo tooñ es fop, donit ndoq ne no pakaad ke mi. A maaf

⁶Ten taxu gore’u we fop a nqeɗang, yaa da njaqna. Boo poofi mayu ke a mbalna, ndaawkee a den muk.

⁷Wo refu njaɓnooxand es, kaa o saytooxaxam no naqad kuu ndefna, widnaam o ɗaay ole na muc ale. A maaf

⁸Mi o Yaal oxe. xam aqatinong soo lalong a ƭat ale waroona o reef. A kid es xan a ngaan na wo, um asang.

⁹Ba nu nand fo pis mbaat fo perkele ƥodaxu ke na ngarniteel a laxaaɓ fo o birdoŋ soom mbaat nqotkee a ƭat.

¹⁰O soxodu xe, coono ƥor mbodun mbaambir, oxe hoolooxna o Yaal oxe o mat, o mbeq um kaa widin.

¹¹Nuun jofu we, mbelakinooxyo no Yaal oxe too ndef no ɗaay. Njibinyo xa soroxole, nuun fop we a qeeñ nuun a njofna.