Read NQAARIIT NE ROOG A kim a tedu ke 34 Bible Online

A kim a tedu ke 34 - NQAARIIT NE ROOG bible

A kim a tedu ke 34

¹A kim alaa fogna na ke Dawid oo. A feraan a cinj ye ta ɗofɗoflooxna mbaambir Abimelek boo ta raxin.

²Kaam gidmaa o Yaal oxe na waxtu fuu refna, gen no simatan kili.

³Mi, o Yaal oxe um fakoortaa. Neewandooxu we a nanaan soo a mbelakinooxaa teen.

⁴Ngaryo i tagas o Yaal oxe. Fat i simatandoor gon um.

⁵Waaƭaam o Yaal oxe, too a jaaɓaxam, a sutaam no caƭar es fop.

⁶Oxe a kid um a ngaanna no ten kaa meleƈaa fo o ɗaay too lupandooxkee yaam a sed.

⁷Mi fee o ñaatu xe, wuuqaam, too o Yaal oxe a nanaxam soo a muclaam no naqad es fop.

⁸Malaaka fee no Yaal oxe kaa yetooxaa me widna we saɗaruuna too kaa muclaa a den.

⁹Yegyo fo and ee o Yaal oxe a faaxa. Oxe na jaɓnooxaa me ten a ɗaaya.

¹⁰Saɗaryo o Yaal oxe, nuun tedu we ten, yaam we saɗaruuna ñakee dara.

¹¹O ñak fo nqeex njombee yaal kalal[8] ke, we na mbaaƭaa o Yaal oxe o mat, ñakee paax leng.

¹²Xa ƥees, ngaryo nan-gilooxaam! Xam aqat a nuun nu saɗar o Yaal oxe.

¹³Oxuu waagoona o ref, o fexangaa o ñoow ole too bug o xuuɗ, ñoowaa no ɗaay,

¹⁴gayi ɗelem of boo laykee paaxeer, gay muuceek of itam na ƭelem a naanax.

¹⁵Fat o goƭatir fo paaxeer soo fi’aa paax, waaƭ jam soo reefanin.

¹⁶A kid no Yaal oxe kaa ngaan took jofu we, nof um a mbetoox na xa buuq den.

¹⁷Mukit fee no Yaal oxe kaa hiɓoox no we na mbi’aa paaxeer, ndax ta ñuf a kon den no lanq ke.

¹⁸Jofu we a ƈufginooxangaa, o Yaal oxe kaa nanaa a den soo a sut a den no naqad den fop.

¹⁹O Yaal oxe xe paam no we a qeeñ den a naqadilooxna, too kaa muclaa we a yiif den a njaqna.

²⁰Paaxeer mayu a naanga o ndalaa o cofu xe, ndaa o Yaal oxe kaa muclan kili.

²¹Kaa gayaa xa kiiƈ um boo o leng teen ɓolooxkee.

²²O soxodu xe koy, kañaan um na warkan, soo fañ we no cofu xe a qicaa hate took den.

²³O Yaal oxe kaa wataa xa laaw no dag um, too fop we na njaɓnooxaa me ten ngeenooxkee no nqeloor naa muk.