Read NQAARIIT NE ROOG A kim a tedu ke 38 Bible Online

A kim a tedu ke 38 - NQAARIIT NE ROOG bible

A kim a tedu ke 38

¹A kim a tedu laa fogna na ke Dawid oo, a gimeel yaa fo sadax fa mbetandoor.

²O Yaal oxe, ba o xawaam kam fuux le wo. Ceƭekaam xa yar, ndaa baa ref kam fuux ɗomu le wo.

³A kas ake wo a ndoomaxam, o ɓay of a dal took es.

⁴Dara naagatee ceŋ no cer es yaam fuux le wo, um ɗomeel ne fodeema fop yaam bakaad es.

⁵Pakaad es a ngartataxam took, kaa da meɗ dis na mi nen ndoq meɗu.

⁶A ƭoy ake mi we nqooñaa soo a mbataa mbor yaam o ƥodaxel es.

⁷Mexey lugup, naag yidaq, too naqad um reftaa ñaal oo ñaal.

⁸Ndet es kaa ilaa, a sum jip, too dara naagatee ceŋ no cer es.

⁹Jegatiim o ndoole, ɗeg cut. Kaam iinaa yaam o jaq ole no xeeñ es.

¹⁰O Yaal oxe, yakaƥaar es fop oxey mbaambir of, too xa iin es kunpa’irang.

¹¹O laaw es kaa fiiƭaa, doole es a wañooxaa, soo o ga es a niifaarat.

¹²Qaariit es fo yoon es kaa ƈufaxam yaam a ƭoy es, fog es a mbod koƭu.

¹³We mbugna njang o ñis es kaa ƭaapanaxam pog. We mbuganaxama paaxeer kaa mbaaƭaa naa da yaqtaxama, a yuuɓaa naa da naxtaxama ñaal oo ñaal.

¹⁴Mi o mat, nen o tam naagiim o nanaa dara. Kaam maar o don es nen o muum.

¹⁵Kaam nand nen o kiin oxaa waageerna fa nan, too o don um waagee yaƥat a lay.

¹⁶O Yaal oxe, na wo ɗagum yaakaar es. O Yaal oxe Roog es, xan o jaaɓaam.

¹⁷Mexe xeɗang ee ba da mbelakinoox na mi, a njeeraam yaam njom ne mi.

¹⁸Fa nqon doŋ yoqɗooreem, too ɗom es oxey fa mi kili.

¹⁹Mexe weejlaa tooñ es, too mexey no jaq yaam pakaad es.

²⁰Fañ es owe ñoowaa tigi, a may doole bo. We sibtaxama cegeer owey gañ.

²¹Kaa ndabditaxam a pi a paax es paaxeer, a mbañraa fa mi, ke um fi’aa paax fop oo.

²²O Yaal oxe, ba o waasaam, Roog es, ba o goƭaam muk.

²³Ñofi gar ƴufgaam, o Yaal oxe, wo fee o Muumucil es.