Read NQAARIIT NE ROOG A kim a tedu ke 40 Bible Online

A kim a tedu ke 40 - NQAARIIT NE ROOG bible

A kim a tedu ke 40

¹O yaal a ƭat ale no jeejeek we a xoolne yee a kim a tedu lene kaa fog na ke Dawid.

²Ɗag’aam yaakaar es no Yaal oxe, too a ƴuugiida farna fa mi, a nan xa buuq es.

³A sutaxam no gamb le na saŋkax ale, no xooɗ-ee-xooɗ le no lopopooƈ le. A geennaxam jiŋ, a caf es a ndiƈoox took ɓil maak, ta woorin a ƭat es.

⁴A ɓekanaxam a kim a qas no don es, a kim a niwir a Roog in. Mayu xan a nga ke ta fi’anaxama, a njeg caƭar soo a ndoon a koolax den no Yaal oxe.

⁵Ndaw o ɗaay no xe hoolooxna o Yaal oxe, a fañ o geleeroox farna fo pangool ke fo we na mbaɗooxaa cegeer.

⁶O Yaal oxe Roog es, jegiro o nand muk. A pi katil ake fi’anoona a in a maya lool, too ke yuuɓanoona a in a magna. Bugaam o layit a den fop soo yegnit a den, ndaa koy, kaa da may boo mbaagaand o lim.

⁷Bugiro sadax muumeen mbaat ci’it no kuu ta waagna o ref, sertiro sadax toxel mbaat sadax fa mbaasnoor pakaad. Wetanaxamo nof es[12].

⁸Ten taxu um lay ee: «Mexey, garaam! Ke waruuma o fi, soƥaam ta bindel kam a pind a tedu ke.

⁹Roog es, o fadin o bug of refu ke felaxama, too kebil of key kam ee kam xeeñ es.»

¹⁰Kaam yegnitaa kam mbokatax maak ne no gimu we o nan o felu le no cofel ole. Ga’aano, maariim o don es, andaano sax, wo o Yaal oxe.

¹¹Migniim o cofel of kam xeeñ es, ndaa kaam laytaa ngor of fo ne o muclitaa. Ɗasniim mbokatax maak ne no gimu we o mbeq of fo ndigil of.

¹²Wo o Yaal oxe, xañkiraamo yirmande of, too o mbeq of fo ndigil of xan a ngen no saytooxaxam.

¹³Taamaala pagkatar owe ndeeraxam, tooñ es a sufoox took es boo waagatiim o ga. Den moƴu o may wiil le no xoox es, too njambaar es oxe ɓutaa.

¹⁴O Yaal oxe, jaɓi muclaam. O Yaal oxe, ñofi gar ƴufgaam.

¹⁵Fat fop we na mbaaƭaa maa njangitna o ñis es a seeƈaar soo a lupandoox. Fat we mbuganaxama taamaala a ndiƈatoox soo a naang ɓot a sed.

¹⁶Fat we na nqeseeyaxam a njaaxiɗ na gaci fa ƭomu fee da njegkaa.

¹⁷Fat fop we na mbaaƭang a sawar too a mbelakinoox na wo! Fat we mbexna a muc ale wo a ngen no layaa yee: «O Yaal oxe a magna!»

¹⁸Mi, kaam ñaat soo rool, ndaa o Yaal oxe xe topatooxaxam. Wo refu ƈufig es fo o baawat es. Roog es, ba o cungnooraam.