Read NQAARIIT NE ROOG A kim a tedu ke 42 Bible Online

A kim a tedu ke 42 - NQAARIIT NE ROOG bible

A kim a tedu ke 42

¹O yaal a ƭat ale no jeejeek we a xoolne yee a cangtax alaa gimeena yoo, a fog na ke no Kookoora we.

²Ne njaf a duñnoortaa xur foofi, neen o laaw es a duñnoortang, wo Roog.

³O laaw es kaa diilooxaa a Roog, a Roog fa ñoow jok fee. A mban um jasnoorkaa fo ten?

⁴Xa kooniit es ndefu ñaamel es ñaal fo o yeng, yaa um layeel kili yee: «Taa Roog of?»

⁵O laaw es oxe ɓutaa kam es, yaa um wetandooxaa jamaane fee ɓerooguuma a ndeer no faan le, ñaaƴaa fa den boo no Mbind Roog ne kam xa ƈeel axe fo o ngidim onqe no faan laa na ndoofandaa.

⁶O laaw es, xar taxu o naqadiloox soo iinaa kam es? Tee o cung a Roog, too and ee xam simatahinin na muc ale mukit[13] um a ɓisiidaa.

⁷Roog es, o laaw es kaa naqadiloox, ten taxu um wetandoortong meeke Yordaan a feritna, no joong o deɓ olaa na xa coong axaa Hermon.

⁸Juwaam oxe xoyaa juwaam fa lakas, ye poofi ke wo a caarooxaa. A yaand ake wo fop owe mbidaxam, a yag-ee-yag ake wo a palaƈaa took es.

⁹O Yaal oxe kaa lalaxam o mbeq um no ñaal ne, soo um gen no xaanan no yeng ole, xeɗaa a Roog fee saqna o ñis es.

¹⁰Kaam layaa a Roog fee refna ɓil es ee: «Xar taxu o weecaam? Xar taxu naqad a lifaa o cok es kili, o waas fañ we mi da ñagadilaxam?»

¹¹A ben ake no fañ we mi kaa ƈaxaa xa kiiƈ es. Kaa da layaxam cay ee: «Wo o mat, taa Roog of?»

¹²O laaw es, xar taxu o naqadiloox soo iinaa kam es? Tee o cung a Roog, too and ee xam simatahinin, ten fee o Muumucil es fa Roog es.