Read NQAARIIT NE ROOG A kim a tedu ke 46 Bible Online

A kim a tedu ke 46 - NQAARIIT NE ROOG bible

A kim a tedu ke 46

¹O yaal a ƭat ale no jeejeek we a xoolne yee a kim alene kaa fog na ke no Kookoora we, a gimteel o ñuxur o weelu.

²Roog refu njaɓnooxand in fa doole in. Kaa ƴufgaa a in kili kam naqad ke.

³Ten taxu i saɗaree dara, lanq ke a yo’nooxangaa sax oo, xa coong axe a ngirdoox no qooƭ ke no maag ole,

⁴mbaat a yag-ee-yag ake a ndititaa, a palaƈaa, a yoɗooxaa boo xa coong axe a sendaa. A maaf

⁵O xuluɓ ole fo a ƈufnand um kaa ƭaayandaa teeru fee Roog, kenand tedu ke no xe Took-ee-took.

⁶Roog oxey kam fee, sendkee muk. Kaa ƴufgan no ke xotitna no mbeet ne.

⁷A saax ake we mbangooxaa, maat ke a sendaa. O ñuxur um a jibangaa, lanq ke a ngiiƈ-ngiiƈin.

⁸O Yaal oxe Hupna fop oxey fa in, Roog fee Yakoob refu saŋe in. A maaf

⁹Ngaryo nga a pi ake no Yaal oxe, com’andtu ke ta fi’aa took lanq ke.

¹⁰O ten na xafaa a ñoq ake boo no cat adna. Kaa duguñaa a qali ke, a ɓolaa a salma ke soo a raaɓaa a sareet-xire ke[15].

¹¹Kaa tee: «Ngeenooxyo too and ee mi refu Roog. Mi na maadooxaa took a saax ake. Mi na maadooxaa took adna fee fop.»

¹²O Yaal oxe Hupna fop oxey fa in, Roog fee Yakoob refu saŋe in. A maaf