Read NQAARIIT NE ROOG A kim a tedu ke 50 Bible Online

A kim a tedu ke 50 - NQAARIIT NE ROOG bible

A kim a tedu ke 50

¹A kim a tedu laa fogna na ke Asaf[20] oo. Roog o Yaal katil oxe refna o Yaal oxe xe layaa soo a xoyaa adna fa muum, a xotit no batand boo no mudand.

²Kam Siyoŋ fee o mosel um a jegeerna sik Roog oxe feeñaa no ndam um.

³Roog in oxe garaa too damee njaambuur um. Fiɗel laa na raaɓaa adooxanun, a und a cegu doole a widin.

⁴Kaa xoyaa asamaan fo lanq, da seede’in yaa ta hate’aa xeet um ee:

⁵«Mbokatanaamoo dag es we ndamooxna na mi, a ngiɓoor fa mi na pexey sadax fee.»

⁶Asamaan kaa yegnitaa o cofel um, yaam Roog refu o Kaahate. A maaf

⁷«Xeet es, nan-gilooxi, jegaam kaa layoonga. Wo Isra’el, mexe jambang, mi fee Roog, refna ref Roog of.

⁸Refee yee sadax ke wo um ɓanjtang, yaam sadax toxel ke wo key mbaambir es cay.

⁹Moofkiim xotaa nqoox no mbind of mbaat a suk pambe na ked of,

¹⁰yaam mi jegu muumeen-a-koƥ ke fop, cegel ke na xa coong axe fop ne da mbodeena a ndefanaam.

¹¹Andaam tiiƭ ke na koƥ ale fop, too puufuɗag ke fop mi jegu a den.

¹²Um xeex’ange, laykoogiroong o ten, yaam adna fee fop fo ke refna teen mi jegun.

¹³Ñaamkiim a tegeƴ ake no qoox ke, yer fo’oy le na suk pambe ke ne’aand.

¹⁴Ɓoxotaam o ngidim of kañ nen sadax, mi fee Roog of, too fadin ke regaxamoona, mi oxe Took-ee-took.

¹⁵Ƴufginooxaam, yaa refoona na naqad, xam muclong, soo o ɓoxotaam o ndam.»

¹⁶O soxodu xe koy, Roog kaa layan ee: «Xar a ɗaxu o dupataa dupat kebil es soo laytaa ngiɓoor es,

¹⁷too a soƥa jaɓiro um yarong, soo o deɓ ke um layaa?

¹⁸O ga’angaa o kuuɗ, o xaariitoor fo ten, soo ref o yoon no seeseeq we.

¹⁹Paaxeer rek na hataa no don of, too xa maaƥ soom ɗelem of a layaa.

²⁰Muu moofoona, o ñu’aa o pog of, fuulnaa ƭool no xe fogtoona yaay fa leng.

²¹Keene o mat o fi’aa, soo o bug’u koy um maar o don es! Foogaa foog ee nen a wo nandum? Muk! Xam ɓanjong soo feednong a pi of fop.»

²²Nuun we na njuumaarooxaxam, mi fee Roog nuun, andyo a paax ke layuuma. Nu mbi’angiran, xam lisit a nuun, too o leng waagkee o mucil a nuun.

²³Oxuu na ɓoxotaxam o ngidim nen sadax a niwaxam, too oxey na ƭat ale um lalitkan a muc es, mi Roog.