Read NQAARIIT NE ROOG A kim a tedu ke 51 Bible Online

A kim a tedu ke 51 - NQAARIIT NE ROOG bible

A kim a tedu ke 51

¹O yaal a ƭat ale no jeejeek we a xoolne yee a kim a tedu lene kaa fog na ke Dawid.

²Kaa naxooxaa ngenar ne no tuleer Natan me Dawid cinj ye oxeene a seeqna fa Batseeba.

³Wo Roog fee mayna fo o mbeq, yirmaam, wo fee yaajna kam, forti pakaad es.

⁴Ɓogaam qac no tooñ es, xoolandaam na bakaad es.

⁵Anddilooxaam tooñ es, too bakaad es oxey cay mbaambir es.

⁶Tooñaaxoong, wo soom, fi paaxeer na kid of. O hate’angaam, kaa war, too o xawangaam, a ƭat oo.

⁷Ga’angi! Kaam rimel jofaƭar, too naa fudeema fud, o paabakaad refum.

⁸Feek bugiro o ɗasnel ndigil ne refna no xeeñ, aqatinaam boog taa kam es o and ole.

⁹Fortiti pakaad es a naaq isoop, too xam xool, ɓogaam, too xan kam es a ranig taw nen galam fo jem[21].

¹⁰Felakinaam too ɗaaynooraam, ndax cer es ke leeƈ’oona a mbecoox.

¹¹Uupi pakaad es, forit tooñ es fop.

¹²Wo Roog, saki na mi xeeñ xoolu, ci’aam yiif xas dalu.

¹³Ba o deɓaam maa goƭoonga, too ba o jaɓ na mi Yiif Tedu le wo.

¹⁴Ɓoxotaam o ɗaay ole jeg’uuma, ye muclaxamoona, too ci’atinaam yiif jagandooxu.

¹⁵Maaga, xam aqatin a ƭat of baabakaad we mbesoonga a cinj, too xan a nomtooxiid me wo.

¹⁶Wo Roog, Roog fee o Muumucil es, muclaam no fo’oy le ɓaxuuma, too xan ɗelem es a xaanaa o cofel of.

¹⁷O Yaal oxe, weti muuceek es, ndax o don es a simatong.

¹⁸O bug’angaa sadax, ɓoxotkoogaam a den, ndaa koy, sadax toxel ke sax mbelirang.

¹⁹Xeeñ gefu refu sadax fee felna a Roog. Wo Roog, deɓkiro muk xeeñ gefu le naqadilooxna.

²⁰Kam o mbeq of, picti took Siyoŋ o paaxel of, maxatin saŋe ke Yeerusaleem.

²¹Maaga, xan sadax ke dalnoona a mbelong, sadax toxel ke fo sadax ke na ndoxeel riw. Maaga, xan fo nqoox a ƥoxotel took o sadaxand ole wo.