Read NQAARIIT NE ROOG A kim a tedu ke 55 Bible Online

A kim a tedu ke 55 - NQAARIIT NE ROOG bible

A kim a tedu ke 55

¹O yaal a ƭat ale no jeejeek we a xoolne yee a kim alene kaa yoonandteel o nqilimb, a ref a cangtax alaa fogna na ke Dawid.

²Wo Roog, rungi nof of na qeƭ es, too ba o ɗas, yaa um ƴufginooxang.

³Nan-gilooxaam too jaaɓaam. Kaam joqooyooxaa mene fo maana, iinaa soo jaaxiɗ

⁴yaam o ñuxur ole no pañ oxe fo ñagadil ke no soxodu xe. Kaa ƥekaxam na taamaala, a ñaatlandaxam kam fuux den.

⁵O laaw es ole fiiƭaa taa kam es, diid le na fa nqon fee a damaam.

⁶Caƭar fo o njaaxɗataand a ndokaxam, um sendaa ne fodeema fop.

⁷Kaam ee: «Ey! Um waag’angaa o jeg a nafir nen a nuukuur, yaaga naagkoogaam fir, dongik maa ñootnoortuuma.

⁸Ƴufkoogaam koƭu soo dalik na koƥ-a-ƥor alaa. A maaf

⁹Ñofkoogaam o waaƭ maa laqooxuuma nqeñ ne na hududaa, a und a maak ale.»

¹⁰O Yaal oxe, nooti yuuƥ ke no fañ es, ɓek a den no ñimatir, yaam ga’iim lakas na teeru fee, a refangee ŋaaloor fo njuumoor.

¹¹Ñaal fo yeng, kaa ƥeedaa took saŋe ke ten, njofaƭar fo a pi a pariƴ a ƥor a ndef kam fee.

¹²O luubax soom refu teen, kuuƭ fo naanaxir a ngen no paayo ke ten.

¹³Refee yee o pañ na wenaxam, yaaga muñkoogaanum. Refee yee oxe sibaxama inooxanaxam, yaam yaaga wootooxkoogaanum.

¹⁴Wo o mat oo, wo fee o kend es, xaariit es fo o yoon es.

¹⁵Kaa i nanoor’u bo, yoonaa ndetaa no Mbind Roog ne, nakir fo a yaj no wiin.

¹⁶Yaasam fa nqon fee a bet fañ es, da nqaad jaaniif fo xa ñis den, yaam kañaan ƥor refu no pind den fo na qeeñ den.

¹⁷Mi o mat, o Yaal oxe Roog um ƴufginooxaa, too xan a muclaam.

¹⁸Nqes oo, njoloor oo, kirand oo, kaam ɗomatooxaa, ref na xa iin, too kaa nanaa o ñuxur es.

¹⁹Kaa wataa o laaw es fa jam na ñoq ale um ñoxoreel, yaam wiin mayu kaa inooxanaam.

²⁰Roog a nana too xan a neewand a den, ten fee mosna mos o maadooxaa, A maaf yaam njegee a suptax a leng too saɗaree a Roog.

²¹O ɓay no koohod kaa dalaa took no we ta reeritna jam, ta maasand ngiɓoor um.

²²Fa lay um moƴu fel fo neew, ndaa xeeñ um xire a fofu, a ƭelem um a moƴ o niin diwliin, ndaa yaaga fop oo laƥ mboose no xool a ndefu.

²³Roxodi a toq of no Yaal oxe, too xan a teeteelong. Xaƴkee muk o cofu xe ta tolof.

²⁴Wiin fo’oy we fo hoohod we o mat, wo Roog, xan o fudin a den kam ee kam gamb le na saŋkax ale too ñoowkee genwal xa yeng den. Mi o mat, hoolooxaaxoong.