Read NQAARIIT NE ROOG A kim a tedu ke 57 Bible Online

A kim a tedu ke 57 - NQAARIIT NE ROOG bible

A kim a tedu ke 57

¹O yaal a ƭat ale no jeejeek we a xoolne yee a kim alene kaa saq o jangooƭ na kim ale ne’eena «Ba o yaq». A cangtax alaa fogna na ke Dawid oo, a naxoorteel o joor ole Dawid, ye ta laqooxna a Sawul no luf naa.

²Wo Roog, yirmaam! Kaam ee yirmaam, yaam wo refu njaɓnooxand es. Kaam laqooxaa yoora a nafir of boo yaa taamaala ke a mbaafkaa.

³Kaam ƴufginooxaa a Roog fee Took-ee-took, a Roog fee na fadnanaxam fop.

⁴Yaasam ta heblantiidaam na asamaan oxaa muclaxama, a sednoor we na ŋaalooxanaxam! A maaf Yaasam Roog a hebliid o mbeq um fo ngor um!

⁵Kaam ref a ndeer wiin waa na ƈaxooxaa nen cogoy ñaañaam wiin kaa a ñiiñ den a nandtaa a salma fo a kas, soo ɗelem den a weel bo, nen laƥ lake.

⁶Wo Roog, lalti o magnel of took asamaan, o ndam of a mayƭand lanq ke fop.

⁷Kaa letnanaam mbaal na ƭat es, ndax da tuuƭaam, a ngasanaam gamb mbaambir es, ndaa den o mat njimbooxu teen. A maaf

⁸Wo Roog, o laaw es a dala, kaam ee o laaw es a dala. Bugaam o xaanang soo xilmbanang.

⁹O laaw es, yokooxi. O nqilimb es fo riiti es, yokooxyo itam, yaam bugaam o yok mbeet ne.

¹⁰O Yaal oxe, kaam bug o simatong a ndeer qeet ke, xaanang a ndeer a saax ake,

¹¹yaam o mbeq of a yaajta nen a asamaan, soo ngor of a ret boo na eel akaa.

¹²Wo Roog, lalti o magnel of took asamaan fee, o ndam of a mayƭand lanq ke fop.