Read NQAARIIT NE ROOG A kim a tedu ke 6 Bible Online

A kim a tedu ke 6 - NQAARIIT NE ROOG bible

A kim a tedu ke 6

¹O yaal a ƭat ale no jeejeek we a xoolne yee a kim alene kaa yoonandteel o nqilimb xa quusi ɓetaa tadaq. A kim a tedu laa fogna na ke Dawid oo.

²O Yaal oxe, ba o xawaam kam fuux le wo. Ceƭekaam xa yar, ndaa baa ref kam fuux ɗomu le wo.

³O Yaal oxe, yirmaam, yaam kaam ñak doole. Wodandaam, o Yaal oxe, yaam kaam sendaa ne fodeema fop,

⁴too o laaw es kaa fiiƭaa. O Yaal oxe, boo a mban neeke koy?

⁵O Yaal oxe, geleerooxi farna fa mi, wataam, muclaam yaam o mbeq of,

⁶yaam oxe xonna, yiif um galagatirang, too maykee boo we jaaniif a simatong.

⁷Kaam iin a iin boo jegatiim o njembe, o yeng oluu refna kaam xuƥandaa njong es sap fo xa kooniit, ƭaap es a siidaa yaam xa lool.

⁸A kid es kaa niifaarat yaam naqad, a mbemekel yaam fañ es fop.

⁹Ngoƭaamoo nuun fop we na mbi’aa paaxeer, yaam o Yaal oxe a nana xa lool es.

¹⁰O Yaal oxe a nana ƈufginax es, kaam ee o Yaal oxe a jaɓa a qeƭ es.

¹¹Fañ es fop xan a sed soo a sendaa rap-rap. Xan a naang ɓot, a ndiƈatoox no ñofu.