Read NQAARIIT NE ROOG A kim a tedu ke 63 Bible Online

A kim a tedu ke 63 - NQAARIIT NE ROOG bible

A kim a tedu ke 63

¹A kim a tedu laa fogna na ke Dawid oo, a naxooxaa a tef ale Dawid na koƥ-a-ƥor alaa Yudaa.

²Wo Roog, wo refu Roog es, kaam fun’ang. Nen mi faa refna kam lanq beeru koroŋ kaa njegeerna o ndoq, o laaw es kaa hoɗomel a wo, cer es a mbiiƭaa na wo.

³Neene, kaam fuudang kam o mbiñ o tedu nqe, ndax um ga katil of fo o ndam of.

⁴O don es kaa ɓoxotang o ndam, yaam o mbeq of moƴu o ñoow ole.

⁵Xam gidmang no ñoow o ñis es fop, yoɗaa xa ƥay es farna fa wo.

⁶O laaw es xan a giñ tem, nen yaa ñaamuuma neebam fo yuur, o don es a simatang, um jalooxaa,

⁷yaa wondooxuuma boo yiif es a gomang, um misiirang kam o yeng ole.

⁸No ndigil, wo refu ƈufig es, too kaam soroxole’aa yoora a nafir of.

⁹O laaw es kaa saaƭoox na wo, a ñamaak of a damtaxam.

¹⁰We mbugna o njang o ñis es koy, xan a saŋkoox, a mbudoox boo no qooƭ ke no lanq ke.

¹¹Xan a mbartel laƥ, a ndefik muud xa ƥox-a-koƥ axe.

¹²Maaga, xan o maad oxe a felakinoox na Roog. Fop we na ndaaɓoortan o mat a mbaaga o mbakoox, yaam maamaaɓ we xan a tiimnel.