Read NQAARIIT NE ROOG A kim a tedu ke 64 Bible Online

A kim a tedu ke 64 - NQAARIIT NE ROOG bible

A kim a tedu ke 64

¹O yaal a ƭat ale no jeejeek we a xoolne yee a kim a tedu lene kaa fog na ke Dawid.

²Wo Roog, nan-gilooxi o ñuxur es, yaa um ɗomatooxaa. Saytooxi o ñis es no pañ oxe um saɗaraa.

³Guutatirandaam fo faan[26] le no soxodu we, a yaj ale na combolaa, a mbi’aa njofaƭar.

⁴Kaa lakaa ɗelem den nen laƥ, nqaaƭ o don den a ref a kas akaa da ƭaayna,

⁵ndax da nqaƴ a den na yelem took no xe ñakna ƥanjel. Asooxkee, yaa da nqaƴaa, too ndiidkee dara.

⁶Kaa saƭakinraa no fi paaxeer, a laytaa pog ke da ƭaapkaa na kunpa soo a ndamtin ee: «O leng ga’kee teen dara.»

⁷Paaxeer ƥor yiif den a galagaa. Kaa layaa yee: «Yuuƥ ne in a jaga a paax. O leng waagee and ke refna kam ee kam xeeñ no kiin.»

⁸Kaa koy, Roog kaa xaƴaa a kas um took den, da ndoomel ndak fo ndak.

⁹Ɗelem den na maafnoorkaa a den, too fop we na nga’kaa a den, xan a mbulaa a qoox.

¹⁰Maaga, wiin we fop xan a ndiid, a yegnitaa calel ke Roog soo a njangit na pi ake ten.

¹¹O cofu xe kaa felakinooxaa no Yaal oxe soo a jaɓnooxaa me ten. Fop we a qeeñ den a njofna xan a mbakoox.