Read NQAARIIT NE ROOG A kim a tedu ke 65 Bible Online

A kim a tedu ke 65 - NQAARIIT NE ROOG bible

A kim a tedu ke 65

¹O yaal a ƭat ale no jeejeek we a xoolne yee a kim a tedu lene kaa fog na ke Dawid. A kim oo.

²Wo Roog, kam teeru fee Siyoŋ i ngelaang[27] o simat too mbadin a tegit in fa wo,

³yaam kaa o nan-gilooxaa a qeƭ ake. Wiin we fop owe ngaraa me wo.

⁴Ndoq ne no pakaad ke in kaa meɗ dis, ndaa kaa o dontan bo tee qac.

⁵Oxe jiloona soo matandiidin, ndax ta gen me wo, a ɗaaya. Xan i ngiñ tem no ɗaay ole no mbind of fo no tedel ole no ngenand ne wo.

⁶Roog o Muumucil in, no cofel of kaa o jaaɓtaa a in a pi a maak, wo fee qeet ke a yaakaarna boo no we no cat adna, bo na pimb ake moƴna o liitoox.

⁷Wo na saƭkandaa xa coong axe fa doole of soo fapoor katil.

⁸Wo na riimnaa ŋurŋur le na xa maag axe, ditit le na yag-ee-yag ake den fo combol-combol le no qeet ke.

⁹We ngenna na adna a ndiida boo no we no cat adna yaam xa anddiloor axe wo. Kaa o ƴeelnooraa wiin we fop, a xotit no batand boo no mudand.

¹⁰Kaa o topatooxaa lanq ke, sooraa a den bo da nquƥ sap soo neqnin. Wo Roog, o xuluɓ ole wo a maya muut fo foofi. Kaa o jagandanaa wiin we a saxad. Neeke o jagandtaa lanq ke:

¹¹Kaa o sooraa a cur ake ten, mokandaa a yilɓit ake ten, xuƥandan sap fo a teƥ ale soo barke’aa col ke.

¹²Kaa o felnitaa o hiid ole paax ke wo, muu reefoona o neq ee picit.

¹³Xa suufand axe na koƥ-a-ƥor ale we neepa bo, a ñaang ake a ndokoox o mbelakinax.

¹⁴Xa kayand axe we kur fo a ked, soo a yulanq ake yee firiis fa bele. Lanq ke we simatang, a ngimang.