Read NQAARIIT NE ROOG A kim a tedu ke 69 Bible Online

A kim a tedu ke 69 - NQAARIIT NE ROOG bible

A kim a tedu ke 69

¹O yaal a ƭat ale no jeejeek we a xoolne yee a kim alene kaa saq o jangooƭ a kim ale ne’eena «Soble-tooq», a fog na ke Dawid.

²Wo Roog, muclaam, yaam poofi ke kaa laxaaɓaam!

³Kaam meexaa kam lopopooƈ le dayeerna. Mexey no xooɗ-ee-xooɗ le no poofi ke, a yag-ee-yag ake a palaƈaa took es.

⁴Waagatiim dara yaam xa buuq. O faƭanq es kaa weer koroŋ, a kid es a nqooɗat bo, yaam ne um cungaa a Roog es.

⁵We sibaxama ngupu wiil le no xoox es. We na mbaaƭaa o saŋkaam kaa njeg doole, a mbañtaam cegeer. Faw um rabid ke guuɗeeruuma.

⁶Wo Roog, andaa ƭof es, too tooñ es kunpa’irang.

⁷Yaasam ba um sednoor we yaakaaroonga, wo o Yaal oxe na refkaa boo faw, woxe Hupna fop. Koo ba um tax we na mbaaƭang a njeg naa ɗomna a den, wo Roog fee Isra’el,

⁸yaam wo taxaxam o weneel, gen no sedlandeel.

⁹Kaam refat o kenar no we i numna ƭeen leng, we fogtuuma yaay fa leng a ngamataxam.

¹⁰O jaflax ole damtuuma mbind of kaa nand nen fiɗel laa na kaƥaa no xeeñ es, too a ben ake no we na mbenang took es a ndalu.

¹¹Loolaam a lool boo torox, hoor, soo keene a wennooraam.

¹²Kaam deroox o saaku, soo da mbi’in a kim.

¹³Mi na jeetaaytateel na baayo fee, refat qaanir no yeeyer say we.

¹⁴Mi o mat, mexe xeɗang, wo o Yaal oxe! Wo Roog, kam o mbeq o maak of, jaaɓaam na waxtu fee jofooxoonga, yaam a muc ale na hataa na wo a woora.

¹⁵Ɗiqtaam no ɗok le, too ba um meexat. Koo fat um muclel no we sibaxama, suudtel no qooƭ ke no poofi ke.

¹⁶Ba o xaƴ a yag-ee-yag ake da palaƈaa took es, jaaniif a ɗuudaam, gamb le na saŋkax ale a wegooraam.

¹⁷O Yaal oxe, jaaɓaam, yaam kaa o faax too may fo o mbeq. Kam yirmande fa maak fee wo, geleerooxi farna fa mi.

¹⁸Ba o ɗasnaam mukit of, mi fee o tag of. Ñofi jaaɓaam, yaam mexey na naqad.

¹⁹Matiidaam, wat o laaw es, muclaam yaam fañ we mi.

²⁰Andaa ne um wenteel, sedlandeel soo neewandel, too ga’aa fañ we mi fop.

²¹A ben ake kaa paangaa kam es, too kaa njiraam sax. Mexey yaakaarooga o yirmel, ndaa dara, cungoogu yaayaal, ndaa ga’iim o leng.

²²A yipanaxam xa tim ndali no ñaamel es, soo ye hoɗomeema, da cooxaam bineegar.

²³Yaasam o rox den a ref mbog naa na damaa a den, toofeen den a ndef mbiir na den.

²⁴Yaasam a kid den a niifaar, o ga den a sooƴ, tiiñ den a nqali boo xoo.

²⁵Fuuxani a den, yaasam fuux ɗomu le wo a yen took den.

²⁶Yaasam o daland den a fes a pec, too ba o leng a genat no ƭiif den,

²⁷yaam kaa ñagadilaa oxe xawoona boo ƴut, a ƥaataa coono no xe diboona.

²⁸Gadni a den tooñ fo ngend um, too ba o jofoor fa den muk.

²⁹Forti a kon den no safe le no ñoow ole, too baa da mbindel fo jofu we o mbiñ o leng.

³⁰Mi kaam ñaat soo coono’aa, ndaa xan o ƴufgaam, yoɗaam, wo Roog.

³¹Xam simatit gon le Roog a kim, ɓoxottan o ndam o ngidim.

³²Keene moƴu fel o Yaal oxe ee nqoox, sund fo xa can um fo xa poxos um.

³³Neewandooxu we xan a nga’in, soo a mbelakinoox. «Nuun we na mbaaƭaa a Roog, yaasam nu saqatin njambaar,

³⁴yaam o Yaal oxe kaa nan-gilooxaa ñaatu we too naagee yapatilaa we njengeena yaam ten.»

³⁵Fat asamaan fo lanq a simatin, xa maag axe fo fop ke na ñoowaa teen,

³⁶yaam xan Roog a mucil a Siyoŋ soo a maxatin teeru ke Yudaa. Xeet um xan a ngenatin a den, a njegat a den.

³⁷We na mbaqaqoorkaa no dag we ten xan a lam a den, we mbexna gon um a sip teen ngenand den.