Read NQAARIIT NE ROOG A kim a tedu ke 71 Bible Online

A kim a tedu ke 71 - NQAARIIT NE ROOG bible

A kim a tedu ke 71

¹O Yaal oxe, na wo um jaɓnooxaa. Koo ba um sed muk.

²Muclaam too wataam kam o cofel of. Rungi nof of farna fa mi too ƴufgaam.

³Refi na mi ɓil saƭku laa um jaɓnooxaa, garaa teen cay. Hebliti um muclel, yaam wo refu ɓil es fo saŋe es.

⁴Roog es, muclaam na xa ƥay no soxodu we, no dang no wiin fo’oy we fo wiin balu-balu we.

⁵O Yaal oxe na refkaa boo faw, wo yaakaarum, hoolooxong no kaa xotitna no ndeƥandoong es.

⁶Naa rimeem wo refu ndamlooxand es, wo o mat suttaxam no fud ya es, wo um simataa kili.

⁷Kaam jaaxɗand jaaku, ndaa wo refu njaɓnooxand es mbooru.

⁸O don es kaa gen no simatang, um xaanaa o ndam of no ñaal ke fop.

⁹Ba o xaƴaam, yaa nogoyuuma, ba o waasaam, yaa doole es a fagna.

¹⁰Fañ es mi a laytataa, we na ƥeedaxam, ndax da njang o ñis es, a nga’raa.

¹¹Kaa layaa yee: «Roog a xaƴaan, fat i ndaabin, naangin nuus, too o leng suqitkiran na xa ƥay in.»

¹²Wo Roog, ba o goƭaam. Roog es, ñofi gar ƴufgaam.

¹³Yaasam we na ñagadilaxam a sed, a saŋkoox! Yaasam we na mbexeyanaxam taamaala a sed, a naang ɓot!

¹⁴Mi o mat, kaam yaakaarang cay, moƴang a moƴ o simataa.

¹⁵No ñaal ke fop, o don es kaa wetandtaa o cofel of fo a muc ale na hataa na wo, too no ndigil, andiim ne da mbodeena.

¹⁶Katil of na garnooraxam, wo o Yaal oxe na refkaa boo faw, too o cofel of soom um laytaa.

¹⁷Wo Roog, aqatinaxamo yaaga um refaa o ndeɓandoong, too boo fa ndiik com’andtu ke wo um yegnitaa.

¹⁸Wo Roog, ba o xaƴaam, yaa nogoyuuma soo fuum. Yaaga xam waag o yegin suk ke na ngaraa doole of, we na ndeefkaxam, um yegin a den katil of.

¹⁹Wo Roog, o cofel of kaa ret boo took-ee-took, wo fee fi’na tig magnu. Wo Roog, an fodu fa wo?

²⁰Xettaam naqad fo taamaala pagkatar yaam wo, ndaa xan o nomtaam o ñoow ole. Xan o inatintaam no qooƭ ke no lanq ke,

²¹ɓaat o magnel es soo yaalahinaam.

²²Maaga, xam simatang, yoonandtin riiti, gimaa ngor of, wo Roog es, xilmbanang, wo o Tedu xe Isra’el.

²³Xam xaanang, ɗelem es a soroxole’aa, yaam wataa o laaw es.

²⁴O don es xan a jeepeetaa o cofel of no ñaal ke fop, yaam we mbexeyanoogaxama taamaala a seda too a seeƈaar.