Read NQAARIIT NE ROOG A kim a tedu ke 72 Bible Online

A kim a tedu ke 72 - NQAARIIT NE ROOG bible

A kim a tedu ke 72

¹A kim alaa fogna na ke Salomo yoo. Wo Roog, fi’i ndax o maad oxe a hate’taa nen a wo, o ƥiy onqeene no maad oxe, o doxnin o cofel of.

²Xan a hate’it xeet fee wo o cofel, ñaatu of weene, ta hate’it a den a ƭat.

³Xa coong axe xan a ƥisiid xeet fee jam, soo a ñaang ake o cofel.

⁴Xan a ɓoxot ñaatu we na xeet fee wargal den, a mucil xa ƥiy axe no rool we, soo a duguñ o ñaañagadil oxe.

⁵Xan o saɗarel feek njeeƈ ne xe wataa, a qoor ale a sutooxaa, no suk boo no suk.

⁶Xan a fudooxiid nen a teƥ alaa na yuuraa took o saawit o gube, nen mbuyaam naa na sooraa lanq ke.

⁷Na jamaane um, o cofel ole xan a xay, soo jam ee gañ, feek o nqool onqe xe maadaa.

⁸Xan a maadoox no ke xotitna na juwaam boo na fa lakas, a dalit no xuluɓ ole Ofrat boo no cat adna.

⁹Fañ we ten xan a ngooknoox mbaambir um, noon um a yer fo ut ole.

¹⁰Maad we Tarsis fo we na pimb ake xan a ƥisiidin ci’it, maad we Saba fo we Seeba a ƥoxotin a bateer.

¹¹Maad we fop xan a ngung mbaambir um, qeet ke fop a ndagooxin.

¹²Xan a mucil o ndool onqe na ƴufginooxaa fo o ñaatu xe yaakaareerna o ndimle.

¹³Xan a yirim o neewu doole xe fo o ndool onqe, a mucil xa laaw axe no rool we.

¹⁴Xan a wat a den no ñaañagadil oxe fo no kiin balu-balu xe, yaam na kid um o ñoow den a jega o njiriiñ.

¹⁵Xan a ñoow soo a cooxel na wurus fee Saba. Xan a gen no xeɗeel soo a simateel cay.[29]

¹⁶Xan bele a naag gañ no saax le, boo na xa cul axe na xa coong axe, xa yaƥ axe a yaandooxaa nen taxar ke Libaŋ, soo teeru ke a sux fo wiin, nen daaƭ xuƥu sap le no lanq ke.

¹⁷Gon um ñufkee boo muk, too ten adooxu meen njeeƈ ne. Xan wiin we a mbarke’teel gon um, a saax ake fop a ƭaayit no ten.

¹⁸O Yaal oxe Roog a hela simatel, Roog fee Isra’el, ten doŋ oxe na fi’aa comlaand!

¹⁹Gon um jegu o ndam a hela simateel boo cay! Fat lanq ke fop a may fo o ndam um! Amiini! Yaasam ta jegit neene!

²⁰Meeke a qeƭ ake Dawid fee o ƥiy Isay a ndayu.