Read NQAARIIT NE ROOG A kim a tedu ke 73 Bible Online

A kim a tedu ke 73 - NQAARIIT NE ROOG bible

A kim a tedu ke 73

¹A kim a tedu laa fogna na ke Asaf oo. No ndigil, Roog a faaxa na Isra’el, no we njegna xeeñ xoolu.

²Yaag oo toox de, yaac’aam o tolof, o ndik o ndutuuñ yaqanu daraakoosiim.

³Kaam siisoogu soxodu we, yaam ga ee faaxeer weene kaa may muud.

⁴Weene wiin njegee coono fa leng. Kaa mbod, a neq, a magin.

⁵Naangee coono’aa nen wiin lakas we, too ñimee o ñaat ole lakas we a ngomaa.

⁶Ten taxu a magnandax a mbi’u ceen o cok, a ƭom-yedar a ref ndobin naa da ndokooxaa.

⁷Kam den kaa may fo kañaan boo a ɓaxooxaa[30], ke xeeñ den a galagaa a ɓek a sak.

⁸Kaa nqaadnooxaa, a ñexet fa lay, a laytaa a magnandax kam kañaan den.

⁹Kaa mbaxnaa a Roog xa ñuxur, too ɗelem den hendkee o leng no lanq ke.

¹⁰Ten taxu xeet fee Roog sax a ngeleeroox farna fa den soo a ƭuudaa xa ñuxur den nen foofi.

¹¹Kaa layaa yee: «Nam Roog a anditkan? Ndax oxe Took-ee-took a jega o and sax?»

¹²Neene soxodu we a nandu, too yaqanee da ngen no yaadax, halal den a ɓaatooxaa.

¹³Yaaga boog xeeñ xoolu es fo xa ƥay es axe mbi’eerna paaxeer leng kasaara yoo.

¹⁴Wo Roog, ñaal oo ñaal kaam ñaataa, nqes nuu refna um yareel.

¹⁵Kaa koy, boo layuuma yee xam layit nen a den, yaaga um hod xa ƥeef.

¹⁶Kaam yiifoogu ndax um and keene, ndaa a ɗom’a na mi lool,

¹⁷boo neen andum kunpa ke wo, wo Roog, soo sogat o and muukandoong ne no soxodu we.

¹⁸No ndigil, xan o xotnoor a den a ƭat a ƥodaxu ruy, ɓakand a den no saŋkax.

¹⁹Ey! Ndak fo ndak, xan a maƥel, a mbagiɗ tak, diid a pat a den.

²⁰O Yaal oxe, ne o ƭaaɗ a sooƴtaa cinj a yokax, neene o ñuftaa a den, yaa inooxoona.

²¹Ye xeeñ es a feƭarna, kam es a fag tak,

²²o ƭof reeƭum, ñak o and, ref nen naak mbaambir of.

²³Yaag oo toox de, mexey kili fa wo, o damaxam no ɓay o ñamaak.

²⁴Kaa o ɗoxtaxam yuuƥ of, boo pafat o jangaam no ndam of.

²⁵An jegum o lakas na asamaan? Ne refoona fa mi, waaƭiim ndamlooxand leng no lanq ke.

²⁶Cer es fo xeeñ es a ngeesangaa sax oo, Roog xan a ref ndamlooxand es fo a las es boo kili.

²⁷We na ngoƭang, xan a saŋkoox, we na mbesang a cinj, a mbaɗooxaa roog lakas, o duguñ a den.

²⁸Mi o mat, o ɗaay es refu um mat a Roog. No Yaal oxe na refkaa boo faw um jaɓnooxaa, lambnaa a pi um fop.