Read NQAARIIT NE ROOG A kim a tedu ke 74 Bible Online

A kim a tedu ke 74 - NQAARIIT NE ROOG bible

A kim a tedu ke 74

¹A cangtax alaa gimeena yoo, a fog na ke Asaf. Wo Roog, xar taxu o waas a in pelek? Xar taxu fuux of a biltooxan a in, in we o siir ole o gayaa?

²Wetandooxi xeet of fee jegoona no miñu kaa, a carind akeene watoona, ndax o jeg a den. Wetandooxi o joong ole Siyoŋ, me sip’oona Ngenand of.

³Fadangi no kefatin keene njegateerna o mbaƈ. O pañ oxe a yaqa fop no mbiñ o tedu nqe.

⁴Noon we wo a mbumbta me o xetteel, a ndoon teen xa anddiloor den.

⁵Kaa mbeeñ kam fee nen waa ƭaayna a ƥaax den kam suungaan.

⁶Fop ke mosandteena a qanq, a mokandtaan a ƥaax fo a kongos.

⁷A ngeƥanda Mbind tedu ne wo, a maafin, a maasand Ngenand ne wo.

⁸Kaa layoogu taa kam den ee: «Fat i nduguñ a den, den fop!» A ndoxa fo mbiñ ne o faɗoorteel fop kam saax le.

⁹Xa anddiloor comlaand nga’ataand, duleer njegatee meen, too o leng na in andee boo a mban neeke.

¹⁰Wo Roog, o pañ oxe kaa bugko paaƈang neeke boo a mban, o noon oxe a gen no xaadnooxang?

¹¹Xar taxu o ŋook xa ƥay of, tuuƭ a ñamaak of? Watneen no ngang of ne faƭanoona, fi tig!

¹²Wo Roog, wo refu o maad in no kaa xotitna no camaane kaa yaaga, wo fee na muclitaa a pi a maak took lanq ke.

¹³Wo xaajtu o maag ole katil of, mokand a qoox ake no ƥaanoor ke no maag ole.

¹⁴Wo gefu ƭuf ke Lewiyatan, soo deɓanin ƥaaɓaan ke na koƥ ale.

¹⁵Wo balnu a cur fo a ƈufnand soo weerin koroŋ o xuluɓ o ŋiiskeer ole.

¹⁶Wo jegu ñaal ne, jeg o yeng ole, wo fee sakna o nqool onqe fo njeeƈ ne.

¹⁷Wo fiisu me lanq ke a ndayna fop, dalin ndiig fo ƈiid.

¹⁸O Yaal oxe, wetandooxi kene: O pañ oxe xe paaƈang, xeet fa ƥodaxu fee a nqaadnooxang.

¹⁹Ba o ɓoxot o ñis no we na ngidmang ƥaaɓaan ke, too ba o weec boo cay o ñoow no ñaatu we wo.

²⁰Dami ngiɓoor of fa in, yaam fo mbiñ fo niɓaanu ne no saax le kaa may fo xa lunq no saasaay.

²¹Ba o xaƴ we ñagadileena, da nomtoox fa gaci, ndaa fat ñaatu we fo rool we a simataa gon of.

²²Wo Roog, inooxi! Xoxti a xoox of. Wetandooxi a ben ake wiin ɓodaxu wene a ndoxanang ñaal oo ñaal.

²³Ba o weecit xa buuq axe no fañ we wo, combol le no we inooxanoonga na nannooxaa cay.