Read NQAARIIT NE ROOG A kim a tedu ke 75 Bible Online

A kim a tedu ke 75 - NQAARIIT NE ROOG bible

A kim a tedu ke 75

¹O yaal a ƭat ale no jeejeek we a xoolne yee a kim alene kaa saq o jangooƭ na kim ale ne’eena «Ba o yaq». A kim a tedu laa fogna na ke Asaf oo.

²Wo Roog, in we simatang, kaam ee in we simatang. Kaa i ƈufginooraa gon of, mbetandtaa com’andtu ke wo.

³Roog kaa tee: «Mi, xam hate’it o cofel na waxtu fee hapuuma.

⁴Lanq ke we ngiiƈ-ngiiƈnaa, we ngenna teen fop a sendaa, ndaa mi na saƭkandaa a toodook ake ten.

⁵Mexey yegnaa we na mbakooxaa yee: ‹Ba nu mbakoox!›, soo soxodu we, um layaa a den ee: ‹Ba nu njaƭit a qoox!›

⁶Kaam ee ba nu njaƭit a qoox took, mbaxnaxam xa ñuxur.»

⁷Refee muk ee no batand mbaat no mudand mbaat na koƥ-a-ƥor ale a yoɗax no kiin a hataa.

⁸Roog kañ refu o kaahate xe, ten oxe na neewandaa o leng oxe, soo a yoɗ o lakas oxe.

⁹O Yaal oxe a deegooxa o feeƭ olaa yipna biiñ faa ñolna boo a fuur[31], too xan a caaranin soxodu we no lanq ke. Den fop xan a yerin, a mbagɗin tak boo a ƥuus nqiim ke.

¹⁰Mi o mat, xam gen no felakinooxaa soo xaanaa a Roog fee Yakoob.

¹¹Xan a maaf a magnandax ale no soxodu we, soo jofu we o mat a yoɗoox took.