Read NQAARIIT NE ROOG A kim a tedu ke 76 Bible Online

A kim a tedu ke 76 - NQAARIIT NE ROOG bible

A kim a tedu ke 76

¹O yaal a ƭat ale no jeejeek we a xoolne yee a kim alene kaa yoonandteel o nqilimb. A kim a tedu laa fogna na ke Asaf oo.

²Roog a ande Yudaa, gon um a magin kam Isra’el.

³Ƭiif um oxaay Saleem[32], Ngenand um a ref Siyoŋ.

⁴Maaga a duguñtu ƥonax qire’ir ke fop, a kas ake fo pegoor ke fo laƥ ke. A  maaf

⁵Wo Roog, kaa o meleƈaa fo a qoolaand, mos boo wee xar kene, yaa o nomtoortiidaa na xa coong axe xawtoona fañ we wo.

⁶Ƥonax ke na salma-koor ake a suqte, da ƭaanaa o ƭaan o yoqooxkaand, a sambir fa doole den.

⁷Wo Roog fee Yakoob, ye ŋaloona a den, ŋaaŋaay fo pis den fop a nqona.

⁸Wo saɗarnooxu tigi! Ndi an waagu o geenoox mbaambir of, yaa fuux le wo a biltooxna?

⁹Took-ee-took asamaan yegnitito hate of. Lanq ke owe cel yaam diid,

¹⁰ye Roog a inooxna ndax ta hate soo a mucil fop we neewandeena no lanq ke. A maaf

¹¹Fuux le no wiin we sax xan a ɓoxotong o ndam, soo we mucna no fuux le wo a mbumbaayanang.

¹²Ndegooryo fo o Yaal oxe Roog nuun too mbadin a den. Nuun fop we mbiduuna, ƥisiidyo o Saɗarnooxu xe ci’it.

¹³Kaa ɓutnaa njambaar no gelwaar we, a saɗarnoox no maad we no lanq ke.