Read NQAARIIT NE ROOG A kim a tedu ke 79 Bible Online

A kim a tedu ke 79 - NQAARIIT NE ROOG bible

A kim a tedu ke 79

¹A kim a tedu laa fogna na ke Asaf oo. Wo Roog, qeet lakas ke a mbañooxaniida saax le wo, a maasand Mbind tedu ne wo soo a mbi a Yeerusaleem juum kefatin.

²A ndeɓana a tud ake xa tal axe no dag we wo, cer ke no we ndamooxna na wo, da ndeɓ a den ƥaaɓaan ke.

³A ƥaxa fo’oy le den nen foofi, ta humbaa me widna a Yeerusaleem fop, too o leng garee, a gas xa tal den.

⁴Gentand we in owey mbenaa a in, we mbidna a in a nqaadnooxaa soo a njalaa a in.

⁵O Yaal oxe, kaa o fuuxankaa a in neeke boo a mban? Ndax naal ne wo kaa bugko kaƥaa cay nen fiɗel?

⁶Naagi fuux le wo wumbang took qeet ke andeeroonga, took maat ke ƈufginooritkeerna gon of,

⁷yaam a lista a Yakoob, a mbayit ngenand den.

⁸Ba o damit a in tooñ ke in yaaga, ndaa yirmi a in no ñofu, yaam kaa i mbagiɗ tak.

⁹Roog o Muumucil in, gari dimle a in yaam o ndam onqe no gon of. Forti pakaad in, wat a in yaam oxe refoona.

¹⁰Ba o xaƴ qeet ke da lay na in ee: «Taa Roog den?» Fat i nga’ood ne o rabdinooraa took qeet keene fo’oy le no dag we wo da ƥaxna.

¹¹Fat xa iin axe no we ndameena a njaaƥatiloox boo me wo. Na pexey o ɓay o jegu katil ole wo, gayi o ñis no we mbaajaneena a bar.

¹²O Yaal oxe, nomti qeet kentand ke in boo a caf ɓetaa ƭaq a ben ake da mbenoonga.

¹³In we xeet of o mat, ndefna o siir ole o gayaa, xan i ngidmang kili, simatang no suk boo no suk.