Read NQAARIIT NE ROOG A kim a tedu ke 81 Bible Online

A kim a tedu ke 81 - NQAARIIT NE ROOG bible

A kim a tedu ke 81

¹O yaal a ƭat ale no jeejeek we a xoolne yee a kim alene kaa saq o jangooƭ no we ngenna Gaat, a fog na ke Asaf.

²Ƈeelanyo a Roog fee refna doole in, kaam ee soroxole’anyo a Roog fee Yakoob.

³Nqaanyo, yo’in ñal le, mbak o nqilimb o mbelu, nquus riiti le.

⁴Njibinyo a luuƥ ake no nqool o ndeɓ onqe fo no nqool o cal onqe, no pes ke no toofeen ke in,

⁵yaam wargal oo na xeet fee Isra’el, Roog fee Yakoob heblitun.

⁶Kaa dalnanin fog we Yoseef, ye ta inooxanna a Misira. Mexe nanaa o ñuxur olaa xooleeraxama, ta layaa yee:

⁷«A toq ale saq’oona na kand of, roxodaanum, too diƈaa a cenjel a meɗu dis ale.

⁸Ye refoona na naqad, ƴufginooxaxamo, too wataaxoong. Jaaɓtaaxoong kam ee kam ƭuuɗ ne. Ɗeetloox’aaxoong paam poofi kaa Meriba. A maaf

⁹Wo xeet es, nan-gilooxaam, jegaam kaa maƭooxoonga. Ey, Isra’el, o nan-giloox’angaam rek!

¹⁰Ba o jeg muk a roog fa lakas faa refeerna mi, too ba o gung mbaambir roog fa njan.

¹¹Mi refu o Yaal oxe Roog of, suttoonga no saax laa Misira. Yaƥati o don of, too xam mayƭandin.

¹²Kaa koy, xeet es nan-gilooxee o ñuxur es, Isra’el a fañaam faƥit.

¹³Maaga, xaƴaam a den no ŋaj den, da ndeefan yuuƥ ke den.

¹⁴Ey, xeet es a nan-giloox’angaam, Isra’el a reef’angaa a ƭat es rek,

¹⁵yaaga neewandkoogaam fañ um no ñofu, o ɓay es a dal took no noon we ten.

¹⁶We sibaxama, mi o Yaal oxe, a ƥoodooxkoogaan soo a ngen no diid boo kili,

¹⁷ndaa wo xeet es o mat, ñoownitkoogaaxoong bele fee moƴna o faax, giñnoortang suum ke no ɓil[36] le»