Read NQAARIIT NE ROOG A kim a tedu ke 86 Bible Online

A kim a tedu ke 86 - NQAARIIT NE ROOG bible

A kim a tedu ke 86

¹A qeƭ alaa fogna na ke Dawid oo. O Yaal oxe, rungi nof of farna fa mi, jaaɓaam, yaam kaam ñaat soo rool.

²Saytooxaam, yaam kaam damoox na wo. Wo Roog es, muclaam, mi fee o tag of, yaam wo hoolooxum.

³O Yaal oxe, yirmaam, yaam wo um ƴufginooxaa no ñaal ne fop.

⁴O Yaal oxe, ci’aam o ɗaay, mi fee o tag of, yaam mexe ɓakandaa xeeñ es na wo.

⁵Wo o Yaal oxe, kaa o faax soo yaaj kam, may fo o mbeq no fop we na ƈufginooxang.

⁶O Yaal oxe, rungi nof of na qeƭ es, nan-giloox a paax a qeƭax es.

⁷Kam naqad es wo um ƴufginooxaa, yaam xan o jaaɓaam.

⁸O Yaal oxe, o leng nandee fa wo a ndeer roog ke, too dara fodee fo a pi of.

⁹Wo o Yaal oxe, wo saku qeet ke fop. Xan a ngar, a ngung na caf of soo a ƥoxot gon of o ndam.

¹⁰Kaa o magin, too kaa o fi’aa comlaand. Wo soom refu Roog.

¹¹O Yaal oxe, andnooraam a ƭat of, ndax um ñaaƴaa no ndigil of. Ci’aam xeeñ damooxu, ndax um saɗar gon of.

¹²O Yaal oxe Roog es, kaam simatang no xeeñ es fop, niwaa gon of boo faw,

¹³yaam o mbeq of na mi kaa magin lool. Ɗuqtitiidaxamo no xooɗ-ee-xooɗ laa jaaniif.

¹⁴Wo Roog, wiin ga’atinooxu a inooxanaxam, a yaj no wiin balu-balu owe mbaaƭaa o ñis es, den we a ƭat den a yongeerna na wo.

¹⁵Wo o Yaal oxe o mat, Roog fa mayu yirmande refo, yaaj kam, muñantaa, may fo o mbeq fo ngor.

¹⁶Ngela wiƈaqilooxaam, yirmaam. Ci’aam doole of, mi fee o tag of too muclaam, mi fee o ƥiy no ceefeer of.

¹⁷Lalaam o anddiloor olaa malaxama. Wo o Yaal oxe, fat we sibaxama a sed, yaa da nga’kaa yee muclaxamo too yaalaam!