Read NQAARIIT NE ROOG A kim a tedu ke 88 Bible Online

A kim a tedu ke 88 - NQAARIIT NE ROOG bible

A kim a tedu ke 88

¹A kim oo. A kim a tedu laa fogna na ke no Kookoora we yoo. O yaal a ƭat ale no jeejeek we a xoolne yee a kim alene kaa yoonandteel a liit. A cangtax alaa gimeena yoo, a fog na ke Hemaan[40], o Ee-esrahi xe.

²O Yaal oxe Roog fee o Muumucil es, kaam ƴufginooxang no ñaal ne, no yeng ole um xeɗang.

³Jaɓi a qeƭ es, rung nof of no ƭomatax es,

⁴yaam deyƭooxaam sik no taamaala ke, jaaniif a songaa o log es.

⁵Mexe limteel no we na njimbooxaa no gamb le na saŋkax ale, nandtataa oxaa jegateerna o njembe.

⁶Kaam waasel pelek nen o qon, nandtaa we ndibeena boo a mbondnel no leeñ a mboy, nen waa a ƭat of a yongateerna na den, o suud o ɓay of na den.

⁷Jooraxamo kam gamb xooɗu, no niɓaan tit, kam qooƭ ke jaaniif.

⁸Fuux le wo a yena took es, a yag-ee-yag ake wo fop a palaƈaa took es. A maaf

⁹Goƭatirandaxamo fo we andrituuma, um watat a den xus nen ƈaq. Mexey wegooxa gik, o sutooxat a xoxaam sup.

¹⁰O Yaal oxe, a kid es kaa nqooɗat yaam coono, um ƴufginooxang ñaal oo ñaal, dekang xa ƥay.

¹¹Ndax naagaa o fi’anaa xon we njomlaand? Ndax we ñakna xan a inoox, a simatong? A maaf

¹²Ndax o mbeq of a naaga o layteel kam a mboy ale, ngor of a ne’eel kam jaaniif?

¹³Ndax comlaand ke wo a ande kam o niɓaan ole, o cofel of kam jaaniif?

¹⁴O Yaal oxe, kaam ƴufginooxang, walditang a qeƭ es nqes teel.

¹⁵O Yaal oxe, xar taxu o deɓaam? Xar taxu o ɗasnaam mukit of?

¹⁶Naa refum o njaaƈ kaam ñaat, o ñis es a ref no xoƥ nquƭ. Kaam roxondoox a qufil ake wo too jaqaam tigi.

¹⁷Fuux le wo oxe dalaa took es, um saŋkooxaa, yaam ne sayanaxamoona.

¹⁸Ñaal oo ñaal kaa ƭuudaxam nen poofi, a mbidaam o kurul-keƥ.

¹⁹Goƭatirandaxamo fo qaariit es fo yoon es, um andrat fo o niɓaan ole doŋ.