Read NQAARIIT NE ROOG A kim a tedu ke 89 Bible Online

A kim a tedu ke 89 - NQAARIIT NE ROOG bible

A kim a tedu ke 89

¹A cangtax alaa gimeena yoo, a fog na ke Eetan[41], o Ee-esrahi xe.

²O Yaal oxe, kaam gimaa o mbeq of kili, yegnitaa ngor of no suk boo no suk.

³Kaam ee o mbeq of kaa maxel boo faw, ngor of a saƭik koŋ nen a asamaan.

⁴Wo layu yee: «Hiɓooraam fo xe jiluuma, daaɓoox fo o tag es Dawid ee:

⁵‹Xam fi o kurcala of a maadaa kili, saƭkand uum-maamaad of no suk boo no suk.› » A maaf

⁶O Yaal oxe, asamaan kaa simatang no comlaand ke o fi’aa, mbokatax ne no tedu we a simataa ngor of.

⁷O Yaal oxe, jegiro o nand meene took, too o leng no pindel ke na asamaan fodee fa wo.

⁸Wo Roog, kaa o saɗarnoox no mbokatax ne no tedu we, saɗarnoox tigi no fop we mbidoonga.

⁹O Yaal oxe Roog fee Hupna fop, an fodu fa wo doole? O Yaal oxe, ngor of widong.

¹⁰Wo na harnaa a ciqtax ale no maag ole, riimnaa a yag-ee-yag ake ten na ndititaa.

¹¹Wo dibu a Rahab, ɓaanoor fee no qooƭ ke, soo warin. Pasaraa fañ we wo fo o ɓay o jegu katil ole wo.

¹²Wo jegu asamaan, jeg lanq ke itam. Adna fa muum fo ke refna teen fop, wo bindun.

¹³Wo saku o ɓemb-roog o janoon fo o ɓemb-roog o ñamaak, o joong ole Taboor fo ole Hermon a ƈeelanaa gon of.

¹⁴A naax of doole fa ƥor a yipooxu, o ɓay of a jeg katil, a ñamaak of a garit fop took.

¹⁵O cofel fo a ƭat ndefu fer le no uum-maamaad le wo, o mbeq fo ndigil a mbodong mbaambir.

¹⁶O Yaal oxe, we na soroxole’anang a ƭaaya! We na ñaaƴaa na qoolaand ale na mukit of.

¹⁷no mbelakinax a ngenu kili yaam gon of, o cofel of a yoɗaa a den.

¹⁸Wo refu katil fa nga’atinoor in, o cok in ole took, yaam ne fartoona a in.

¹⁹Pegoor in oxe me no Yaal oxe, o maad in a ref me no Tedu xe Isra’el.

²⁰Mos’aa o lay we ndamooxna na wo no mbeeñil ee: «Ƴufgaam a salma-koor, yoɗit a ndeer xeet fee oxe jiluuma.

²¹Ga’aam a Dawid fee o tag es, ɗuumtin diwliin fa tedu es.

²²Xam damtin o ɓay es o saƭku, a naax es a ci’in doole.

²³O pañ oxe waagkiran o bet, too o cofaƭaru xe waagkiran o neewand.

²⁴Xam duguñ fañ um na kid um, xaw we sibuuna.

²⁵Ngor es fo o mbeq es xan a ndef fo ten, um yoɗ o cok um took.

²⁶Xam ci’in sañ-sañ took o maag ole, a ñamaak um a hame xa quluɓ axe.

²⁷Xan a xoyaxam ee: ‹Wo refu Faap es, wo ref Roog es, ɓil jaɓnooxand es.›

²⁸Mi itam oo, xam fi’in taaw es, ta hup maad we na adna fee.

²⁹Xam fexin boo kili, too ngiɓoor ne mi fo ten xan a saƭik koŋ.

³⁰Xam dalin o kurcala um boo faw, too uum-maamaad um xan a xuuɗit nen a asamaan.

³¹Boo xa taan um a ndeɓna kebil es, a mbañ o ndeef ke dalnuuma,

³²a ƭap bargal es, too ngayee ke hebluuma,

³³xam inooxan a den fo o cap, ndax um xaw nanaƭar den, fad a den yaam tooñ den.

³⁴Kaa koy, suqitkiim no ten o mbeq es too hodkiim ngor es.

³⁵Ɗegkiim ngiɓoor es fo ten too dakooxkiim a cinj no ke regtuuma.

³⁶Daawaam o daaɓoorit o tedel es too maaɓkiim a Dawid boo muk.

³⁷O kurcala um xan a ref boo faw, uum-maamaad um a fodaam mbaambir nen njeeƈ ne,

³⁸a sax boo cay nen o nqool onqe. O seede xe kam a eel ake kaa gore.» A maaf

³⁹Yaag oo toox de fuuxanaa oxe ɗuumoona, deɓin, waasin pelek.

⁴⁰Ɗegaa ngiɓoor ne dalin’oona fo o tag of, maasand o ndip no maad um, deɓin a lanq.

⁴¹Sexaa xa kur na ƥit ake ten fop, gef saŋe ke ten tuƈ.

⁴²Dak-a-faaf we fop a mbiitnaan, gentand we ten a mbenan.

⁴³Fi’aa boo fañ we ten a maafin, ɗaaynoor noon we ten fop.

⁴⁴Ɗuknaa weel le no laƥ ne ten, too damtino na ñoq ale.

⁴⁵Sooƴnaa o ndam um, jiƭit uum-maamaad le ten a lanq.

⁴⁶Xuufaa a pe ake no ndeƥandoong um, sednoorin ɓot. A maaf

⁴⁷O Yaal oxe, kaa o laqooxkaa neeke boo a mban? Ndax fuux le wo kaa bugko kaƥaa cay nen fiɗel?

⁴⁸Wetandooxi yee o ñoow es kaa raƥ lool, and ee xa ƥiy Aadama xe sakoona ndefee dara.

⁴⁹Ndax a jega oxaa na ñoowaa too reefkee na fa nqon muk mbaat ta suqit o ñoow um no ɓay jaaniif? A maaf

⁵⁰O Yaal oxe, taa o mbeq of onqe yaaga, taa ke reg’oona a Dawid fo a taaƥ kam ngor of?

⁵¹O Yaal oxe, ba o weec a ben ake dag of a ndoxaneel. Wetandooxi yee kaam gadoox qeet ke fop mayna bo.

⁵²O Yaal oxe, fañ we wo kaa mbenaa rek, kaam ee kaa mbenaa o jaf ole oxe ɗuumoona a ñaaƴna.

⁵³O Yaal oxe a hela gidmeel boo cay! Amiini! Yaasam ta refit neene!