Read NQAARIIT NE ROOG A kim a tedu ke 9 Bible Online

A kim a tedu ke 9 - NQAARIIT NE ROOG bible

A kim a tedu ke 9

¹O yaal a ƭat ale no jeejeek we a xoolne yee a kim alene kaa saq o jangooƭ na kim ale ne’eena «Xonan o ƥeenqe». A kim a tedu laa fogna na ke Dawid oo.

²O Yaal oxe, kaam simatang fo xeeñ es fop soo yegnitaa com’andtu ke wo fop.

³Kaam felakinooxaa soo beƈekoox na wo, xaanaa gon of, wo xe Took-ee-took.

⁴Fañ es kaa nga’ong rek, a ndakoox o jiijing, a tolof soo a saŋkoox.

⁵Xoxtaxamo soo ɓoxotaam ɓur. Kaa o moof took uum-maamaad of too ref o kaahate cofu.

⁶Ŋalaa a saax ake, saŋik o soxodu xe soo ñuf a kon den boo faw.

⁷Fañ we a paange tak, a nduguñel boo nem. Ruudnaa teeru ke den, too a betandax den a ñufa ɗuƭ.

⁸O Yaal oxe o mat na maadooxaa boo kili, too a sipa uum-maamaad um ndax ta hate.

⁹Xan a hate adna fee fo o cofel soo a ɓoxot qeet ke ɓur na ƭat.

¹⁰O Yaal oxe refu njaɓnooxand no xe na ñaatlandeel, a ref laqooxand no naqad ke.

¹¹We andoonga a njega a koolax na wo, yaam waaskiro we na mbaaƭang, wo o Yaal oxe.

¹²Nqaananyo o Yaal oxe genna Siyoŋ, yegnit a ndeer qeet ke a pi katil um.

¹³Kaa rabdinooxanaa we fo’oy den a ɓaxeena, a wetandooxaa a den too weeckee xa buuq no ñaatu we.

¹⁴O Yaal oxe, yirmaam too ga coono es ke we sibaxama a ngaritna, wo xe na suqtitaxam na xa ton-maax axe na fa nqon fee,

¹⁵ndax um jeepeetaa kam nqel ne Siyoŋ ke taxna o simateel fop soo ref no mbelakinax na muc ale na hataa na wo.

¹⁶Qeet ke a njimbooxa kam gamb le da ngasna, o jaf den a lok no mbaal ne da mbogtoogna.

¹⁷O Yaal oxe a lalta oxe ta refna, a ɗeg hate, soo o soxodu xe a yen no mbog ne ta ɗaapna. A yoor, a maaf

¹⁸Soxodu we fop xan a nqaad jaaniif, we mbeecna a Roog fop a nqon.

¹⁹O ndool onqe koy, weeckaand boo faw, too yaakaar ne no ñaatu xe taskee boo xoo.

²⁰O Yaal oxe inooxi, ndax o kiin oxe ga’atinooxkee. Fat qeet ke a ngar mbaambir of, o hate a den.

²¹O Yaal oxe, diidlandi a den. Fat da and ee wiin soom a ndefu. A maaf