Read NQAARIIT NE ROOG A kim a tedu ke 90 Bible Online

A kim a tedu ke 90 - NQAARIIT NE ROOG bible

A kim a tedu ke 90

¹A qeƭ ale Moyiis fee o kiin Roog oo. O Yaal oxe, no suk boo no suk wo refu njaɓnooxand in.

²Yaaga xa coong axe njegafulee, yaaga sax sakafuliro lanq ke fa adna fee, yaaga boo fa ndiik wo refu Roog, too wo na refkan bo na moos boo moos.

³Wo na nomtaa wiin we no lanq ke, lay a den ee: «Nuun xa ƥiy Aadama, nomtooxyo.»

⁴Na kid of xa kiid juni kaa ndef nen ñaal ne faak faafna, nen waxtu fa leng kam o yeng ole.

⁵Kaa o xuufaa o ñoow in, ne o ƭaaɗ a wattaa yaa yokooxoona. Kaa i nand nen daaƭ xuƥu,

⁶andoona yee a xesangaa a saxaa, a sultaa, boo roog a yaaraa ta gubel, a weer koroŋ.

⁷A woora yee fuux le wo kaa raaɓaa a in, fuux ɗomu le wo kaa diidlandaa a in.

⁸Dara kunpa’irang no njofaƭar in, tooñ ke i ƭasnaa sax kaa naang dañ na kid of.

⁹Fuux le wo kaa iroox took in na pe in fop, xa kiid in a muukooxaa nen ngatandax.

¹⁰Xa kiid in owe ngape no qarɓeen ɓetuu ƭik, we moƴna mbel njelem a ndetaa boo no qarɓeen ɓetuu tadik, ndaa o lorax fo coono doŋ a nqottaa teen, yaam o ñoow miñee dara, soo i yet fir.

¹¹An andu doole fee no fuux le wo, a and fuux ɗomu le wo, ndax ta saɗarong?

¹²Andnoori a in ne o ñoow ole a raƥitna, ndax i njeg yiif.

¹³O Yaal oxe, kaa o xurulooxkaa a in neeke boo a mban? Nomtooxiidi, yirim a in, in we dag of!

¹⁴Nqes nuu refna giñnoorti a in o mbeq of, too no ñoow in fop xan i ndef kam o ɗaay fo o sawar.

¹⁵Felakini in ñaal podne neewandoona a in, xa kiid xa podne i njegna naqad.

¹⁶Yaasam i nga a pi of, in we dag of, xa ƥiy in a nga o ndam of.

¹⁷Yaasam o paaxel ole no Yaal oxe Roog in a ref fa in! Saƭkandi jale na xa ƥay in. Kaam ee saƭkandi jale na xa ƥay in.