Read NQAARIIT NE ROOG A kim a tedu ke 91 Bible Online

A kim a tedu ke 91 - NQAARIIT NE ROOG bible

A kim a tedu ke 91

¹Oxe na yoogooxaa me no xe Took-ee-took, a jaɓnooxaa me no Cegu katil oxe,

²oxeene kaa layaa yee: «O Yaal oxe, wo refu njaɓnooxand es fo saŋe es, wo refu Roog es, wo hoolooxum.»

³O Yaal oxe na mucilkang no pog ke o ɗaapaneel fo na piste fa mbaawar.

⁴Xan a saytoortong a naf um, o jaɓnooxaa yoora a nafir um. Ngor um kaa ref pegoor fo ƥonax saƭku.

⁵Saɗarkiro taamaala ke no yeng ole mbaat a kas ale na yetaa ñaal ne

⁶mbaat piste fee na sookaa kam o niɓaan ole mbaat a seel ale na xawaa njoloor o mbuc.

⁷A soƥangaa sax ee wiin juni kaa yen a paam of, soo cuni xarɓaxay na ñamaak of, ñiiñax ñaaƴkirang.

⁸Kaa o bugko ɗeetaa doŋ, ga’aa ne Roog a rabditaa soxodu we.

⁹O Yaal oxe refu njaɓnooxand of, fi’aa no xe Took-ee-took o genand of.

¹⁰Paaxeer leng dalkirang, too taamaala fa leng matiidkee mbind of,

¹¹yaam xan a heblanong malaaka ke ten, ndax da saytooxang muu o jofaa.

¹²Xan a meeɓong, yaam ndik o kamas ɓil.

¹³Xan o ñaaƴaa took njogoy fo sax, dakaa o njogoy o njanglax fa Niŋki-naŋka.

¹⁴O Yaal oxe kaa tee: «Feek kaa saaƭoox na mi, xam muclin. Xam saytooxin, yaam a anda oxe refuuma.

¹⁵Xan a ƴufginooxaam, too xam jaaɓin. Xam ref fo ten, yaa ta refna na naqad. Xam watin, ɓoxotin o ndam.

¹⁶Xam ci’in o xuuɗ, muclin.»