Read NQAARIIT NE ROOG A kim a tedu ke 92 Bible Online

A kim a tedu ke 92 - NQAARIIT NE ROOG bible

A kim a tedu ke 92

¹A kim a tedu laa na gimeel na bes fee na ñootnax ale yoo.

²A faaxa, ndax o Yaal oxe a simateel, gon of a xaaneel, wo oxe Took-ee-took.

³Ndaw ne ta felitna, yaa i yegnitaa o mbeq of nqes teel, soo no yeng ole ngor of,

⁴yoonandtan a kooraa fo riiti fo o nqilimb.

⁵O Yaal oxe, ke fi’oona a mayƭandaxam fo o ɗaay, um felakinooxaa no jale of.

⁶O Yaal oxe, a pi ake wo a magna lool, soo a qalaat ake wo a nqooɗ bo!

⁷O ƭof oxe andee teen dara, fanxoy fee waagee o dam teen tus.

⁸Soxodu we kaa neepaa nen daaƭ, fiifi paaxeer we fop a sultaa, ndaa xan a moocandel boo cay.

⁹Wo o Yaal oxe, wo gartu fop took boo faw.

¹⁰Fañ we wo o mat, o Yaal oxe, kaam ee fañ we wo o mat xan a saŋkoox, fiifi paaxeer we fop a pasaroox.

¹¹Ci’axamo doole naak-a-koƥ, juur took es diwliin fa ƥuuɓu yem.

¹²Kaam fuudaa fañ es we maafeena, nof es a nanaa xa paɗax no soxodu we songiid’axama.

¹³Jofu we kaa neepaa nen ngeec, a maakaa nen taxar seedar ke Libaŋ.

¹⁴Kaa njimbel no Mbind ne no Yaal oxe, a neepaa no maax ole no mbind ne Roog in.

¹⁵Kaa maad o ndimaa no nogoy den, a may fo goon bo, a nquƥaa sap,

¹⁶a yegnitaa yee o Yaal oxe a jofa. Ten refu ɓil saƭku le mi, too njofaƭar leng refee no ten.