Read NQAARIIT NE ROOG A kim a tedu ke 94 Bible Online

A kim a tedu ke 94 - NQAARIIT NE ROOG bible

A kim a tedu ke 94

¹Wo Roog o taarabdinax oxe, wo o Yaal oxe, Roog o taarabdinax oxe, laltinooxi no ndam of.

²Wo o kaahate xe na adna fee, naagi daket, ndax o rabid ga’atinooxu we a pi den.

³O Yaal oxe, soxodu we kaa mbugko mbumbaayooxaa neeke boo a mban? Kaam ee boo a mban?

⁴Fiifi paaxeer weene kaa ƥelewƥelewnaa, a magnandooxaa na fa lay, a mbakooxaa.

⁵O Yaal oxe, kaa da ñagadilaa xeet of, a ñaatlandaa we jegoona.

⁶Kaa mbaraa o ñaaw oxe fo o gataakon ole, a njangaa o ñis no waan ole

⁷soo a ndamtin ee: «O Yaal oxe ga’iran, Roog fee Yakoob andee teen tig.»

⁸Mbootooxyo boog, nuun wiin ɓodaxu we! Nuun panxoy ke, ndi a mban nu andkaa tig?

⁹Oxe saxinna nof no kiin, ndax waagee fa nan? Oxe sakna a ngid, ndax waagee a ka?

¹⁰Oxe na yaraa a saax ake, ndax waagee a qaw? O Yaal oxe na aqatinaa pindeef ke

¹¹a anda a qalaat no kiin, yaam nqeñ ƥor a refu.

¹²O Yaal oxe, oxe o yaraa soo aqatintan kebil of a ɗaaya.

¹³Kaa yaadooxaa yaa fo ñaal taamaala ke, a jopir o soxodu xe a waqaneel gamb.

¹⁴O Yaal oxe deɓee xeet um, waaskee we ta jegna.

¹⁵O cofel xan a hate’tateel, too fop we a qeeñ den a njofna xan a yoon teen.

¹⁶Ndi an na faritkaxam no soxodu we, a layooranaam fo fiifi paaxeer we?

¹⁷Boo o Yaal oxe a ƴufig’eeraxama, o laaw es a xaadkooga jaaniif no ñofu.

¹⁸Mbanuu lay’uuma yee: «Took o yen jofum», o mbeq of saƭkandoogaxam, wo o Yaal oxe.

¹⁹Mbanuu jeg’uuma kaa fidaxama, yaaloogaxamo soo ci’aam o ɗaay.

²⁰Ndax reeraa tig fo haahate yednu weene na njaɓnooraa kebil ke, ndax da or o njakad?

²¹Kaa mbokatooranaa o cofu xe, a ndamnooraa a jaambuur fee,

²²ndaa o Yaal oxe refu saŋe es, Roog es refu ɓil jaɓnooxand es.

²³Kaa rabdaa a den njofaƭar den, a saŋkitaa a den kañaan den. Kaam ee o Yaal oxe Roog in kaa saŋkaa a den.