Read NQAARIIT NE ROOG A kim a tedu ke 96 Bible Online

A kim a tedu ke 96 - NQAARIIT NE ROOG bible

A kim a tedu ke 96

¹Ngimanyo o Yaal oxe a kim a qas. Nuun adna fa muum, ngimanyo o Yaal oxe.

²Ngimanyo o Yaal oxe, simat gon um. Naangyo yegnitaa ñaal oo ñaal yegil mbaax ne na muc ale ten.

³Lambinyo o ndam um a ndeer a saax ake, com’andtu ke ten a ndeer qeet ke fop,

⁴yaam o Yaal oxe a magna too a simat jombiran. Ten moƴu o saɗarnoox roog lakas ke fop,

⁵yaam roog ke no qeet ke fop roog tefee ndigil a ndefu, ndaa o Yaal oxe saku asamaan fee.

⁶A qoolaand fo o niwel mbodun mbaambir, katil fo o ndam a ndef kam Mbind um.

⁷Nuun qeet ke na saax ake fop, ƥoxotyo o Yaal oxe o ndam um fa katil um.

⁸Ƥoxotyo gon le no Yaal oxe o ndam, ndokiid no maax ole no mbind um, ƥislooxiid ci’it.

⁹Ngungyo mbaambir no Yaal oxe, yaa ta feeñkaa kam o tedel um. Sendyo mbaambir um, nuun adna fa muum.

¹⁰Yegnityo a ndeer qeet ke yee: «O Yaal oxe refu o maad, lanq ke kaa saƭik koŋ boog, too sendkee muk. Kaa hate’taa qeet ke o cofel.»

¹¹Fat asamaan a felakinoox, lanq ke a ndef no ɗaay, o maag ole a fangoox fo ke refna teen fop.

¹²Fat a koƥ ale a sawar fo fop ke refna teen. Fat taxar ke na suungaan ake fop a njibin xa ƈeel

¹³mbaambir no Yaal oxe, yaam oxe garaa. Oxe garaa, ndax ta hate adna fee. Xan a maadooxanit adna fee o cofel, qeet ke, ta maadooxanit a den ngor um.