Read NQAARIIT NE ROOG A kim a tedu ke 98 Bible Online

A kim a tedu ke 98 - NQAARIIT NE ROOG bible

A kim a tedu ke 98

¹A kim a tedu yoo. Ngimanyo o Yaal oxe a kim a qas, yaam a fi’a comlaand. A maafta a ñamaak um, o ɓay um o tedu le.

²O Yaal oxe a andnoora a muc um, a feeñil qeet ke o cofel um.

³A wetandooxa o mbeq um fo ngor um no mbind Isra’el. Cat ke no lanq ke fop a nga’a a muc ale hatna na Roog in.

⁴Nuun adna fa muum, soroxole’anyo o Yaal oxe, njibin xa ƈeel, nqaanin.

⁵Nqilimbanyo o Yaal oxe, kaam ee nqilimbaneenoo, ngimanin,

⁶yoonandtin fangax a luuƥ fo a seelumb. Soroxole’anyo o Yaal oxe refna o maad.

⁷Fat o maag ole a fangoox fo ke refna teen fop, adna fee fo we ngenna teen.

⁸Fat xa quluɓ axe a mbox, soo xa coong axe a ƈeelandoor

⁹mbaambir no Yaal oxe, yaam oxe garaa, ndax ta maadoox took lanq ke. Xan a maadooxanit adna fee o cofel, qeet ke, ta maadooxanit a den a ƭat.