Read NQAARIIT NE ROOG Xa peƭit axe 13 Bible Online

Xa peƭit axe 13 - NQAARIIT NE ROOG bible

Xa peƭit axe 13

¹O ƥiy o mbaax kaa nan-gilooxaa yar faap um, o qaaxaadnax oxe mat a ƭat um yongee no soqanqol.

²Oxuu refna fa lay um a gidmiteel, hoohod we mat xan a mbuq a ƭom-yedar den.

³Oxe waagna dam o don um kaa gayaa o ñis um, oxe o don um a yuuraa mat a ƴufanaa a saŋkax um.

⁴Feeñaak fee kaa yuxmaa, ndaa daawkee dara, duuña fee mat xan a giñ tem.

⁵O cofu xe kaa sib a ƭelem a maamaaɓ, o soxodu xe mat a gaci’nooraa, a fuulnaa ƭool.

⁶O cofel no xe a ƭat um a njofna kaa saytooxan, kañaan o mat a saŋkaa o yaal um.

⁷Leng we kaa mbi’ooxaa jegu too njegee tus, lakas we mat a mbi’ooxaa rool too a njeg halal fa mayu.

⁸O yaal halal, o laaw um kaa dalaa yaam o jeg um, o ndool onqe mat, o leng daawree fo ten.

⁹A qoolaand ale no jofu we kaa naag qac, o lampa le no soxodu we mat a ñufaa ɗuƭ.

¹⁰A magnandax qasir doŋ a oraa, o nan-gilooxaa xa as axe mat a ref o jeg-yiif.

¹¹Halal fa onjaand naagee miñaa, fee kos-kosneena mat kaa ɓaatooxaa.

¹²Yaakaar miñu kaa ɗomaa xeeñ, o bug ole fadnooxna mat a ref ndaxar o ñoow.

¹³Oxe na xeefaa a maƭax xan a ga’in, oxe na reefaa xa as axe mat kaa saɗgeel.

¹⁴A cangin no yaal-o-and kaa ref a cur o ñoow, a guutatirandaa fo ke na gartaa fa nqon.

¹⁵O cegu yiif oxe kaa niweel, a ƭat ale no hoohod we mat jegee ngakand.

¹⁶Oxe jegna yiif kaa ɗeetaqinaa soo a fi’kaa, fanxoy fee mat a laltaa o ƥodaxel um.

¹⁷O lulaaƥe paaxeer kaa oraa taamaala, o kore’u xe mat a sakaa jam.

¹⁸Ndool fa gaci ndefu a las no xe na fañaa yarel, oxe a ƭat um a yongna no soqanqol o mat kaa niweel.

¹⁹O bug ole fadnooxna kaa fel bo, ten taxu panxoy ke mbugee mbaas paaxeer.

²⁰Oxe na yoonaa fo jegu yiif we kaa jegaa o and, oxe na nakraa fo panxoy ke mat malkiran.

²¹Taamaala na ƥeedaa baabakaad we, jofu we mat a saɗgiteel baneex.

²²O kiin o paaxu kaa xaƴanaa xa taan um lam, o jeg no paabakaad oxe mat a geekanel o cofu xe.

²³O qol ole o ndool onqe a xooxna kaa wataa mayu, o cofaƭaru xe mat, kaa moƴ a moƴ o ñakaa doole um.

²⁴Oxe yarkeerna o ƥeem kaa fañin, oxe fexna o ƥeem o mat kaa yaran.

²⁵O cofu xe kaa ñaamaa boo a giñ, o soxodu xe mat a gen no nqeex.