Read NQAARIIT NE ROOG Xa peƭit axe 14 Bible Online

Xa peƭit axe 14 - NQAARIIT NE ROOG bible

Xa peƭit axe 14

¹O tew o cegu yiif na geennaa mbind, oxe ɓodaxna mat a geftan a pesoorooƭ um.

²Oxe na ñaaƴaa no cofel kaa saɗar o Yaal oxe, oxe na xotaa a ƭat a quƴooxu ke mat kaa xeefin.

³Fa lay fa maamagnandax fee no panxoy ke kaa xawnooraa a den, we njegna yiif o mat o don den a saytooxaa a den.

⁴Oxe jegeerna qoox saxadkee dara, ndaa o jeg a den a faaxa, yaam doole den na ɓisiidaa ndiig mbaax.

⁵O seede paax maaɓkee, o seede maamaaɓ oxe mat cegeer rek a layaa.

⁶O qaaxaadnax oxe kaa waaƭaa o jeg-yiif, ndaa jegkiran, o cegu yiif oxe mat a yooɓaa and.

⁷Goƭi a fanxoy fee, yaam xotitkiro no ten o and o leng.

⁸O jeg-yiif ole no kiin oxe fodna o mbid refu yee kaa and ke ta fi’aa, panxoy ke mat o ƥodaxel den a naxaa a den.

⁹Panxoy ke kaa ŋastaa bakaad, jofu we mat a mbel a Roog.

¹⁰Naqad no xeeñ no yaal um a dayaa, o ɗaay um itam, o leng waagiran o xaajir fo ten.

¹¹Mbind ne no soxodu we xan a gefel, ƭiif ne no jofu we mat xan a saqit.

¹²Jaaku kaa mboog ee a ƭat a paax ale a nqotu, kaa koy, na ƭat ale na ɓisaa na fa nqon a ndefu.

¹³O kiin a waaga ƴeelaa, too xeeñ um a naqadiloox, o ɗaay a fagangaa, naqad yoqu.

¹⁴O cofaƭaru xe xan a buq o gaf ole na pi um, o kiin oxe fodna o mbid o mat kaa saɗgiteel a pi a paax um.

¹⁵Oxe raƥna yiif, kuu ta layeena a gimin, o kiin o teeyu xe mat a xalaataa soo a fi’kaa.

¹⁶O cegu yiif oxe kaa saɗaraa paaxeer, a wootooxan, fanxoy fee mat a foolaa a fi, yaam a foog ee oxey no woor.

¹⁷Oxe yooɓna fuux kaa fi’aa ƭooɗofir, o yaal yuuƥ paaxeer a qicanaa a xoox um mbañir.

¹⁸O ƥodaxel refu a las no we ndaƥna yiif, jofu we mat o and a ref o ndip den.

¹⁹Faaxeer we kaa mbar o ngungaa mbaambir faax we, soxodu we na xa ton-maax no jofu we.

²⁰O leng bugee xaariitoor fo o ndool, bo no yoon um sax, qaariit ke no yaal halal oxe mat kaa mayaa bo.

²¹Oxuu xeefna o kend um, a fi’a bakaad, oxe na yirmaa neewu doole we mat a ɗaaya.

²²Ndax we na yuuɓaa paaxeer naangee mo’aa? We na yuuɓaa paax o mat xan a ndaaw o mbeq fo ngor.

²³Calel kuu ndefna o njiriiñ a ndimaa, fa lay fa ƥor o mat a gartaa o ñak.

²⁴Halal fee kaa ref o ndip no we njegna yiif, o ƥodaxel a ref a ƈang no panxoy ke.

²⁵O seede paax kaa muclaa xa ñis, o seede maamaaɓ oxe mat a lawandaa naanaxir.

²⁶Oxe saɗarna o Yaal oxe a jega ndamlooxand saƭku, xa ƥeem a njeg njaɓnooxand.

²⁷Saɗar o Yaal oxe kaa ref a cur o ñoow, a guutatirandaa fo ke na gartaa fa nqon fee.

²⁸Xeet fee a saqtangaa, o ndam no maad oo, xeet fee a jaakangee koy, a saŋkax um oo.

²⁹Oxe yooɓeerna fuux kaa jeg yiif, oxe matna xeeñ o mat kaa laltaa mbanxoy um.

³⁰O laaw o dalu refu o ñoow cer, naal o mat a ŋeesaa o kiin.

³¹Oxe na toroxandaa o ndool onqe, kaa xeef oxe sakuuna, yirim o toroxu xe mat a ref o niw o saasak um.

³²O soxodu xe, kañaan um na maafan, o cofu xe mat a jega a koolax boo na fa nqon.

³³Kam xeeñ no ƴiƴ we o jeg-yiif ole a refaa, ndaa waagaand o ga a ndeer no panxoy ke.

³⁴O cofel na yoɗaa xeet, bakaad a ref gaci um.

³⁵O tag o paax kaa felaa o maad oxe, o tag o paaxaƭaru mat a fuuxnooran.