Read NQAARIIT NE ROOG Xa peƭit axe 15 Bible Online

Xa peƭit axe 15 - NQAARIIT NE ROOG bible

Xa peƭit axe 15

¹O doonanqol o ɓuuɓu kaa ɓoosdandaa fuux, fa lay fa ñexetu mat a umban.

²Fa lay no cegu yiif oxe kaa fel o nan-gilooxel, o don no panxoy ke mat ƥooɓodaxir doŋ a layaa.

³A kid no Yaal oxe kaa nga’aa muu refna, ta horooxaa faax we fo soxodu we.

⁴Fa lay fa saƭakinir kaa ref ndaxar o ñoow, fa lay fa ñexetu mat a ɓolaa cer.

⁵Fanxoy fee kaa yapatilaa yar faap um, oxe xaƴna yiif um no soqanqol o mat a jeg yiif.

⁶Halal fa mayu a jega no mbind no cofu xe, ke o soxodu xe a jegna mat kaa kasaara’ooxaa.

⁷Xa ton no jegu yiif we o and a pictaa, a qoox no panxoy ke mat, dara refee teen.

⁸O Yaal oxe kaa sib sadax ke no soxodu we, a qeƭ no jofu we mat a felin.

⁹O Yaal oxe kaa sib o ñoowooƭ no soxodu xe, ndaa kaa fex oxe na reefaa o cofel ole.

¹⁰Fa yar tigi kaa xufaa oxe ɗapna a ƭat, oxe sibna o soqanqol o mat xan a xon.

¹¹O Yaal oxe a anda ke na xewaa kam ee kam jaaniif, nam boog a anditkeeru ke refna no yiif no kiin!

¹²O qaaxaadnax oxe jaɓee soqel, retkee muk me no we njegna yiif.

¹³Kam fa mbelu kaa letnaa a tagid, xeeñ naqadilooxu mat a gooynaa.

¹⁴Oxe jegna yiif kaa waaƭaa o and, xa ton axe no panxoy ke mat a ƈufanaa ƭooɗofir.

¹⁵Ñaal ke no ñaatu xe fop kaa mbeƭaraa, oxe kam um a felna mat a gen no mbumbaay.

¹⁶Jeg halal fa mayu too o laaw of dalee, jeg o ndik too saɗar o Yaal oxe moƴun.

¹⁷Ñaamaa nqoox ngude too mbofanir fo njaaku kam, ñaamaa laalaap too ndef na jam moƴun.

¹⁸Oxe matna xeeñ kaa oraa qasir, oxe niidna fuux o mat kaa xafaa ndaawir.

¹⁹A ƭat ale na feeñaak fee kaa may kiƈ, a qal ale no jofu we mat a fodrandel.

²⁰O ƥiy o njegu yiif kaa ɗaaynooraa a faap um, o ƥiy o ƥodaxu mat a gaci’nooraa a ya um.

²¹O ƥodaxel kaa ref o ɗaay no we ndaƥna a yiif, o ƈiƴ oxe mat a ƭat a cofu le a xotaa.

²²Yuuƥ tasu, ñak o laamit na gartan, ndaa a jegangaa aa-as mayu, da ñaaƴ.

²³Waag o doonanqol o mosu kaa ref a cur o ɗaay, fa lay fa mbaax faa layeena na waxtu um a fel bo.

²⁴O cegu yiif oxe kaa xotaa a ƭat ale no ñoow ole, a sag took, a wootooxaa ale na ɓisaa jaaniif, refna a lanq.

²⁵O Yaal oxe kaa jiƭtaa mbind ne no magnandooxu xe, lanq ke no ñaaw oxe mat ta xoxtan.

²⁶O Yaal oxe kaa sib a qalaat a paaxeer ake, fa lay fa mbaax o mat a felin.

²⁷Oxe buge’na kaa loraa mbind um, oxe jaɓeerna gerel o mat xan a ñoow.

²⁸O cofu xe kaa xalaataa soo a doonkaa, xa ton no soxodu we mat paaxeer soom a yuuraa.

²⁹O Yaal oxe kaa goƭaa soxodu we, ndaa kaa nan-gilooxaa a qeƭ ake no jofu we.

³⁰O ɗeet o mosu kaa ɗaayandaa xeeñ, o nan o felu a sawarnaa cer.

³¹Oxe xaƴna yiif um na xa soqanqol axe na ƥisaa no ñoow ole, xan a fog no we njegna yiif.

³²Oxe fa yar fee a haaleerna kaa xeefaa o ñoow um, oxe jaɓna soqel o mat a jegaa yiif.

³³No saɗar o Yaal oxe o jeg-yiif a aqatoorteel, a neewandax a adooxanaa o ndam.