Read NQAARIIT NE ROOG Xa peƭit axe 16 Bible Online

Xa peƭit axe 16 - NQAARIIT NE ROOG bible

Xa peƭit axe 16

¹O kiin oxe kaa liiƥaa, ndaa o Yaal oxe na ɗegaa.

²O kiin oxe kaa xalaataa yee kuu ta fi’na a faaxa, ndaa o Yaal oxe na jaqtaa a yiif ake.

³Gaɗi fop of no Yaal oxe, too xan o jeg ne bugoona.

⁴Kuu o Yaal oxe a fi’na tig taxun, boo no soxodu xe sax jagandaneena ñaal taamaala ne.

⁵O Yaal oxe kaa sib oxuu magnandooxna. Ñakkaand o xaw muk koy.

⁶O mbeq fo ngor kaa muuraa tooñ, o saɗar o Yaal oxe a taxaa o wootoox paaxeer.

⁷Boo a pesoorooƭ no kiin a felna o Yaal oxe, a naagaan o jofoorandaa fo fañ um sax.

⁸Jeg mayu kaa leweeroonga, jeg o ndik too ta lewong moƴun.

⁹O kiin oxe kaa liiƥaa a ƭat um, ndaa o Yaal oxe na ɗoxaa a caf um.

¹⁰O maad kaa laytaa nen a Roog, naagee juumaa, yaa ta hate’aa.

¹¹Balaas fa mbaax fa bastul fa mbodu o Yaal oxe a bugu, fo mboox ne ƥekeena kam nafa, a anda a den fop.

¹²Maad we kaa sib a pi a paaxeer, yaam o cofel na saƭkandaa gamb no maad le.

¹³O don ole na layaa cofu felu o maad, ta fex oxe na layaa ndigil.

¹⁴Fuux no maad kaa ref o anddiloor fa nqon, ndaa o kiin o cegu yiif a waagaan o ɓoosdand.

¹⁵A tagid a letu no maad kaa woornaa o ñoow, yirmande um a ref nen a teƥ ngam.

¹⁶Waaƭ o jeg-yiif moƴu wurus, waaƭ o and a moƴ xaaliis fa nqoolu.

¹⁷Jofu we kaa ngoƭatiraa fo paaxeer, oxe na gayaa a pesoorooƭ um a geekaa o ñis um.

¹⁸A magnandax kaa gartaa o njakad, o nga’atinax a ɓisiidaa njom.

¹⁹Lasraa o njangal fo magnandooxu we, neewandoox fo rool we moƴun.

²⁰Oxe na horooxaa fa lay kaa jegaa baneex oxe hoolooxna o Yaal oxe a refaa no ɗaay.

²¹Oxe jegna yiif kaa xoyeel o ƈiƴu xe, fa lay fa ƥuuɓu a gimnooraa ke layeena.

²²O jeg-yiif ole kaa ref a cur o ñoow no xe jeguuna, xaw a fanxoy fee a ref kasaara.

²³Oxe jegna yiif fa lay um kaa jegaa xoox, too a gimnooraa o kiin fa lay.

²⁴Xa ƭelem xa pelu kaa ndef nen xef suum, a ƥutandaa xeeñ, a mbaadnaa cer.

²⁵Jaaku kaa mboog ee a ƭat a paax ale a nqotu, kaa koy, na ƭat ale na ɓisaa na fa nqon a ndefu.

²⁶O kiin o fud um a jalanaa, nqeex um a ɓekan teen.

²⁷O kiin o caree tus kaa yuuɓaa taamaala, a dal o ñuxur.

²⁸Oxe xooɗna nof kaa oraa qasir, oxe yuurna o don a gefaa nqaariit.

²⁹O kiin fo’oy oxe kaa ɗooqlooxaa o kend um, a xotnoorin a ƭat a paaxeer.

³⁰Oxe na waraa a ngid, paaxeer a fofu, oxe na ŋatooxaa, a yuuɓ ke ta fosooxna boo a ƴut.

³¹Xa puum kaa ndef o ndip o niwel, a njegteel na ƭat ale no cofel ole.

³²Oxe niidna o fuux moƴu a salma-koor, oxe waagna harin a xoox um a moƴ oxe na jaɓaa teeru.

³³Mbanjang ne kaa yo’neel no noflax sabadoor, ndaa ke na jegkaa no Yaal oxe a inooraa.