Read NQAARIIT NE ROOG Xa peƭit axe 17 Bible Online

Xa peƭit axe 17 - NQAARIIT NE ROOG bible

Xa peƭit axe 17

¹Mbind ne mayna fo a tegeƴ, soo qasir ke a naang kur, ñaamaa saaƈ ƥor too ndef na jam moƴun.

²Surga fa njegu yiif kaa kelfa’aa o ƥiy o ngoor onqe na gaci’nooraa too xan a jeg a las no lam ne na xa ƥiy axe.

³Xaaliis fa wurus kaa ƭeetloorteel fiɗel, a qeeñ ake mat o Yaal oxe na ɗeetlooxaa a den.

⁴Oxe na fi’aa paaxeer kaa nan-gilooxaa fa lay fa njofaƭaru, o maamaaɓ oxe a rungaa nof um na fa lay faa na ɓisaa na saŋkax.

⁵Oxe na xaadnooxaa o ndool onqe kaa xeef oxe sakuuna, oxe sawarna na taamaala no lakas ñakkaand o xaw.

⁶Xa taan axe kaa ndef o ndip no nogoy we, paap ke a ndef qaaƴoor na xa ƥiy den.

⁷Fa lay fa njegu njiriiñ jagee fa fanxoy fee, ne’atiim xa maaƥ a njag fo o kiin o maak oxe.

⁸A jega waa mboogna yee nger kaa ref ɓil laa na gartaa muud, muu da ndetna, a njeg ne da mbugna.

⁹Oxe na waaƭaa o mbeq, kaa muuraa tooñ, oxe na wetandtan o mat a gefaa nqaariit.

¹⁰O ƈiƴu xe kaa xaƴaa yiif um no soqanqol, fanxoy fee mat xa yar teemeed ƭaxee no ten tus.

¹¹O soxodu xe, siiknoor doŋ a waaƭaa, ndaa xan o qir o say a hebliidel took um.

¹²Xet fo ursu naa xa ƥeem a njangeena moƴu xet fa fanxoy, yaa o ƥodaxel ole ten a garanuuna.

¹³Oxe na rabditaa paaxeer paax ke ta fi’aneena, paaxeer inooxkee no mbind um muk.

¹⁴O fer nqasir kaa ref o balin paŋ. Waaseen boo a ñoq a helko fo jegaa!

¹⁵Oxe na ɓoxotaa oxe tooñna ɓur fo xe na gadnaa a jaambuur fee tooñ, den ɗik fop, o Yaal oxe kaa sib a den.

¹⁶Xar xaaliis no ɓay fanxoy a ɗaxu? Ndax a jega yiif laa ta jiktituuna o jeg-yiif?

¹⁷No kuu ta waagna ref, xaariit naagee hodaa, o pog a ƴufgaa kam naqad ke.

¹⁸Oxe na gadooxaa o kend um no lad, a regit o rabdan o lakas, kaa ñak-xoox.

¹⁹Oxe fexna nqasir a fexa bakaad, oxe magnandooxna, a oraa o njakad.

²⁰O kiin o booraƭaru naagee jegaa baneex, taamaala a yenaa took o naanax oxe.

²¹Oxuu rimna o ƥiy o ƥodaxu a jeg naqad, faap no ƭof naagee felakinooxaa.

²²Kam fa mbelu kaa ci’taa o wod-fo-ɓaal, xeeñ naqadilooxu mat a ŋeesaa cer.

²³O soxodu xe kaa jaɓaa nger na pet, a naɗaa a ƭat o cofel.

²⁴O ƈiƴ oxe kaa fi’taa fop o jeg-yiif, fanxoy fee mat a ceek-ceeknaa no kuu refna.

²⁵O ƥiy o ƥodaxu kaa naqadilaa a faap um, a paangaa kam no xe ñootuuna.

²⁶O cofu xe a maalel, xotee a ƭat, ne’atiim o yaal o sedel a xawel.

²⁷Oxe na harnaa fa lay um o yaal yiif oo, oxe fodna o mbid a ref o kiin o ƈiƴu.

²⁸Fanxoy fee sax a naagangaa tiimaa, kaa nandtaa o cegu yiif, a yaƥatangee o don um a nand nen o ƈiƴu.