Read NQAARIIT NE ROOG Xa peƭit axe 19 Bible Online

Xa peƭit axe 19 - NQAARIIT NE ROOG bible

Xa peƭit axe 19

¹O ndool onqe woorna moƴu a fanxoy fee na layaa naanaxir.

²O jaflax ole yooneerna fo o and faaxee, too oxe na ñofandooxaa bo ta hup kaa juumaa.

³O fanxoy no kiin kaa ɓekan no coono, soo ta fuuxan o Yaal oxe.

⁴Halal kaa gartaa qaariit mayu, o ndool onqe mat a ñakaa xaariit fee ta yoqiɗna sax.

⁵O seede maamaaɓ oxe ñakkaand o xaw, oxe na layaa cegeer daɗkee.

⁶Wiin mayu kaa njeyaa o kiin o maak oxe, fop a ndef xaariit no xe na ci’taa.

⁷Fog we no ndool onqe fop kaa mbañan. Nam boog qaariit um a ngoƭitkeerun? A bugangaa lay fa den sax, da naangin mes.

⁸Oxe na waaƭaa o jeg-yiif kaa fex a xoox um, oxe na gayaa o ƴiƴ ole a jegaa baneex.

⁹O seede maamaaɓ oxe ñakkaand o xaw, oxe na layaa cegeer xan a saŋkoox.

¹⁰O mbel-fo-neq jagee fa fanxoy fee, ne’atiim o paɗ a maadooxaa took gelwaar we.

¹¹Oxe jegna yiif yooɓee o fuux, qaaƴoor um a ref o ñak o dam tooñ.

¹²Fuux no maad kaa nand nen o bumb njogoy, yirmande um o mat a nand nen liim took daaƭ.

¹³O ƥiy o mbanxoyu kaa ɓekaa a faap um na taamaala, o tew o ƭaaɗangtax a nand nen bomb laa na si’aa.

¹⁴Mbind fa halal kaa lamteel no daan waa, o tew o cegu yiif o mat, ci’it no Yaal oxe yoo.

¹⁵Mbeeñaak kaa riñaa o kiin no ƭaanar, oxe tayilna a xeexeel.

¹⁶Oxe na gayaa kebil ke Roog, o ñis um a gayaa, oxe a ƭat um a yongeerna na pesoorooƭ um koy xan a xon.

¹⁷Oxe na yirmaa o ndool onqe, o Yaal oxe a rawnaa, too xan a rabdin a pi um.

¹⁸Yari o ƥeef, yaa ta maadna o waagooxaa, ndaa baa fuux a tax o warin.

¹⁹Oxe fuux a adnaa kaa maaleel, a xeɗooxanange yoo, xan a nomtoox teen.

²⁰Nan-gilooxi xa as axe, jaɓ fa yar fee, ndax o jeg yiif no ke yoqna no ñoow of.

²¹Xeeñ no kiin kaa fofaa yuuƥ mayu, ndaa ke o Yaal oxe a bugna na jegkaa.

²²O woor refu ke moƴna no kiin, too ref o ndool moƴu ref o maamaaɓ.

²³Saɗar o Yaal oxe kaa ɓisaa no ñoow ole, o ɗaan boo fal o saq, too taamaala fa leng sagooxkirang.

²⁴Feeñaak fee kaa ɓekaa o ɓay no roon ole, ndaa a tayla naq a luux.

²⁵Xawi o qaaxaadnax oxe, too xan fanxoy fee a xotit teen yiif. Soqi o ƈiƴu xe, too xan a and ke o ne’aa.

²⁶Oxe na daawraa fa faap um soo a raxaa a ya um kaa ref o ƥiy o njegee jom, a gaci’nooraa.

²⁷O ƥees, o xaƴangee yiif of na fa yar fee, yaaga xan o goƭatir fo fa lay fee no and ole.

²⁸O seede caree tus kaa xeefnooraa o cofel ole, o don no soxodu we a ɗuuɗaa njofaƭar ne.

²⁹A qaw na cungaa o qaaxaadnax oxe, xa yar a njagandanel ndiiñ ne na fanxoy fee.