Read NQAARIIT NE ROOG Xa peƭit axe 20 Bible Online

Xa peƭit axe 20 - NQAARIIT NE ROOG bible

Xa peƭit axe 20

¹Biiñ kaa ɓekaa o kiin no nqaadnax, a yer a qaaɗu a riñan no may fa lay. Oxe da adinna jegee yiif.

²Fuux biltooxu no maad kaa nand nen o bumb njogoy, oxuu ɓekuuna teen, kaa xirooxaa.

³Oxe na ƴufaa nqasir, o ndam oo no ten, fanxoy fee mat kaa jimbooxaa teen.

⁴Oxe jaɓeerna xooxaa deɓeel, naagee saxadaa dara, too a ƥarax a faktitkan.

⁵A qalaat no kiin kaa nand nen poofi a ngas a qooɗu, ndaa oxe ƴiƴna a waaga o ƴeew teen.

⁶Jaaku kaa yegnitaa o waag den, ndaa oxe woorna a ɗome o and.

⁷O kiin oxe a jofangaa too a woor, xa ƥeem axe na nguutankan sax a ƭaaya.

⁸O maad oxe xaa moofaa no hate’and ole, a jaqtirand ke faaxeerna.

⁹An waagu o lay ee: «Dapaam xeeñ es, xool qac na bakaad»?

¹⁰O Yaal oxe kaa sib we na njiriiñooraa a poox a podeer mbaat eedir paaxeer.

¹¹O njaaƈ a naaga laltaa na pi um oxe ta refkaa, a naaga woorkaa soo a jof, a waage o and.

¹²O Yaal oxe kaa fi nof ndax ta nanaa, a fi a ngid ndax ta ga’aa.

¹³Waasi o ƭaan o mayu, yaam ndik o rool. Ɗeeti a kid of too xan o jeg ñaamel teyu.

¹⁴O ciijik oxe kaa layaa yee: «Faaxee tus!» soo a retaa a damtin ee: «Ɗegaam xoox um.»

¹⁵A jega wurus fo xa peme xa pogreer, ndaa ɗelem le na layaa o jeg-yiif hupu o njiriiñ.

¹⁶Boo o kiin a gadooxna o lad no kenar, jangi ndoki um. A gadooxangaa oxaa ta andeerna, sereen ta cooxong ngaasnit.

¹⁷Ñaamel ke leweerna kaa mbel no kiin bo. Kaa koy, taa mbaambir xan o don um a may fo a kac.

¹⁸Xa as xa paax na mbadnaa yuuƥ, xire a yoontaa a kortax.

¹⁹Oxe na ñu’aa retaa kaa huytaa kunpa ke. Ba o yoon fo xe o don um a yuuraa.

²⁰Oxe na salooxaa a faap um fa ya um, xan o ñoow um a nuk nen o lampa ñufu ndeer o niɓaan.

²¹Halal fee jegeena no ñofu naagee barke’aa no muukandoong ne.

²²Ba o lay ee: «Xam rabdinoox paaxeer ke fi’eema.» Dooni yaakaar of no Yaal oxe, too xan a dimle’ong.

²³O Yaal oxe kaa sib a poox a podeer, too balaas fa mbaaxeer feliran.

²⁴O Yaal oxe na ɗoxaa a caf no kiin, yaaga koy, nam o kiin oxe a anditkaa a ƭat um?

²⁵Fool a fool kesan o Yaal oxe tig, faaxee, yaam o ricooxangaan taa mbaambir ɗaxkatee tig.

²⁶O maad o cegu yiif kaa jaqaa soxodu we, a xaw a den a qaw ƭool.

²⁷Haaƭ no kiin kaa ref o lampa no Yaal oxe, a ɓaalaa boo kam ee kam no kiin.

²⁸O paaxel fo ngor na ngeekaa o maad no maat um, a saƭkandan no uum le ten.

²⁹Doole refu qaaƴoor no mbes ke, xa puum a ndef kañoor no nogoy we.

³⁰A uut fo kaañax na ƭaxaa coxod, xa yar axe a mbaadnaa kam ee kam no kiin.