Read NQAARIIT NE ROOG Xa peƭit axe 21 Bible Online

Xa peƭit axe 21 - NQAARIIT NE ROOG bible

Xa peƭit axe 21

¹A qalaat no maad kaa ndef nen a ƥaaxaand foofi no ɓay no Yaal oxe. Kaa ɓakandan muu feluuna.

²O kiin oxe kaa xalaataa yee kuu ta fi’na a faaxa, ndaa o Yaal oxe na jaqtaa ke taxna ta fi’el.

³Fi’aa a pi a cofu fo a ƭat moƴanu o Yaal oxe sadax ke.

⁴O ɗeet nga’yaamoo fo o felnax, o jam oleene no soxodu we bakaad doŋ oo.

⁵Yuuƥ ke na duuña fee kaa ngartaa o neq, oxe ferketekna mat a yenaa no ndool.

⁶Halal fee jegteena na xa maaƥ naagee miñaa soo a ɓisaa o yaal um na fa nqon.

⁷Ngiin fo’oy ne no soxodu we kaa maafnooraa a den, yaam kaa mbañaa o mbi ke jofna.

⁸Oxe na tooñaa a ƭat a quƴooxu a reefaa, oxe xoolna mat a fesoortaa o cofel.

⁹Gen na paƭam-ndap moƴu gen fo o tew o ƭaaɗangtax.

¹⁰O soxodu xe, paaxeer rek a xememaa, naagee yirmaa a xaariit um sax.

¹¹O qaaxaadnax oxe a xawange, oxe raƥna yiif xan a jegatin, o cegu yiif oxe a aqatel, o and um a ɓaatoox.

¹²O Yaal oxe[3] kaa horooxaa mbind ne no soxodu xe, a ɓekan na sabab.

¹³Oxe na suxlooxaa ƈufginax no ndool onqe, xan a ƴufginoox ten fa xoox um, too jaaɓkaand.

¹⁴Ci’it ne cooxteena na kunpa kaa ɓoosdandaa fuux, neexil ne ɓoxoteena na pet a riimnaa ngañak.

¹⁵O ɗaay a refu no cofu xe, yaa o cofel a ñaaƴneel, a ref yaq no we na mbi’aa paaxeer.

¹⁶Oxe na ɗapaa a ƭat ale no jeg-yiif ole took o xaad maa no xon waa a jofu.

¹⁷Oxe bugna pel no ndool a genkaa, too oxe fexna biiñ fo ñaamel pelu jegkee halal.

¹⁸O cofu xe kaa watteel o soxodu xe, o koohod oxe a gomaa coono kaa o booru xe a gomkeerna.

¹⁹Genkaa fo o tew o ƭaaɗangtax oxaa na fuuxnooraa, gen no lanq kaa mbi’na a koƥ-a-ƥor moƴun.

²⁰Halal fa njegu njiriiñ fo pelu kaa ndefaa no ngenand ne no cegu yiif oxe, fanxoy fee mat a salaxaa ke ta jegna fop.

²¹Oxe jofna too a faax kaa jegaa o ñoow fo o cofel fo o ndam.

²²O cegu yiif oxe kaa rokaa na teeru fee no cambaar ke, a maaf saŋe cegu doole ke da yaakaar’ina.

²³Oxe na damaa o don um fo ɗelem um kaa guutatirandaa a xoox um fa naqad.

²⁴Oxe felnooxna, a ɗeettaa nga’yaamoo, o qaaxaadnax oo, kuu ta fesooraa ta yoon fo a magnandax a ƭomu um.

²⁵Ke feeñaak fee a bugna na waran, yaam xa ƥay um njaɓee njal tig.

²⁶No ñaal ne fop kaa yaawaa, o cofu xe mat a ci’taa no fud o letu.

²⁷O Yaal oxe kaa sib sadax fee no soxodu we, moƴtaa sax, yaa da ƥoxottuuna a qalaat a paaxeer.

²⁸O seede maamaaɓ oxe xan a saŋkoox, oxe na nan-gilooxaa mat xan a nan-gilooxel, yaa ta layaa.

²⁹O soxodu xe kaa hiɓaa a tagid, o cofu xe mat a woornaa a pesoorooƭ um.

³⁰O jeg-yiif mbaat o ƴiƴ mbaat a kortax ƭaxee tus, yaa o Yaal oxe a fuuxanoonga.

³¹Pis kaa humneel yaa fa xire, ndaa o Yaal oxe na cooxtaa o ndam onqe.