Read NQAARIIT NE ROOG Xa peƭit axe 22 Bible Online

Xa peƭit axe 22 - NQAARIIT NE ROOG bible

Xa peƭit axe 22

¹O jeg gon moƴu halal fa mayu, o andel a moƴ xaaliis fa wurus.

²O yaal halal oxe fo o ndool onqe mbodu, yaam o Yaal oxe saku oxuu refna na den.

³O kiin o qofu xe kaa ga’aa taamaala fee na garaa soo a woñin, oxe raƥna yiif o mat a suuraa rek soo a gomin.

⁴A neewandax fo o saɗar o Yaal oxe kaa rimaa halal fo o ndam fo o ñoow.

⁵Kiƈ fo pog kaa ndef na ƭat ale no kiin o laawooxu xe. Oxe bugna o ñis um kaa goƭan.

⁶Merandi o njaaƈ onqe a ƭat ale ta warna o reef, too a maakangaa, ɗapkatiran.

⁷O yaal halal oxe kaa maadooxaa took no rool we, oxe na rawaa a ref o paɗ no xe na rawnan.

⁸Oxe na duufaa njofaƭar, o torox a saxadkaa, too o samb ole no kañaan um xan a ɓolel.

⁹Oxe ranigna kam xan a barke’el, yaam kaa ci’aa o neewu doole xe no ñaamel um.

¹⁰Raxi o qaaxaadnax oxe, too xan nqasir ne a ɗeg, ñimatir ne fo a ben ake a ndiim.

¹¹Oxe fexna o yaal xeeñ xoolu, a waag fa lay, o maad oxe xan a ref xaariit um.

¹²O Yaal oxe kaa gayaa o and ole, ndaa kaa huytaa fa lay fee no naanax we.

¹³Feeñaak fee kaa layaa yee: «Njogoy ney tafil, mexaa sutooxaa, um warel no mbed ne!»

¹⁴O don no tew o seeseeq oxe kaa ref gamb xooɗu, oxe o Yaal oxe a fuuxanna xan a yen teen.

¹⁵Ƭof kaa sax no xeeñ no njaaƈ, o loq ole na fa yar fee na sutkan teen.

¹⁶Oxe na toroxandaa o ndool onqe, kaa jegnooran halal, oxe na ci’aa o yaal halal oxe, a roolnooran.

¹⁷Rungi nof of too nan-giloox fa lay fee no jegu yiif we, xaƴ yiif of no and ole um daawnang.

¹⁸A faaxa lool ndax o geek a den taa kam of, da ngen no don of.

¹⁹Kaam bug o jangnong xaye, ndax o hooloox o Yaal oxe.

²⁰Ndax kaa bindaniroong xa peƭit qarɓeen tadik axaa na asang, a ƥaatang yiif?

²¹Kaa andnoorang ke woorna fo fa lay fa ndigil, ndax o waag o doon oxe luloonga fo fa lay fa mbooru.

²²Ba o lukit o ndool onqe yaam o neew doole um, ba o ñaatland o toroxu xe no xeloorand ole,

²³yaam o Yaal oxe xan a fartin soo a lukit we na luktan.

²⁴Ba o jegir fo xe yooɓna fuux, ba o yoon fo xe matna xeeñ,

²⁵yaam ndik o mer a ƭat ake ten, ta refat na wo a cikax o ñis.

²⁶Ba o gadoox o kend of no lad, regit o rabdan o lakas.

²⁷O jegangee kaa rabditoona, xan fop of a jaɓel boo no njong ne o wondooxaa sax.

²⁸Ba o riñ a tet ake daan of a mbiisna yaaga.

²⁹Muu ga’oona oxaa waane’na no ke ta jalaa, o mboƭomsogor jalnoorkiran, ndaa o maad oxe.