Read NQAARIIT NE ROOG Xa peƭit axe 23 Bible Online

Xa peƭit axe 23 - NQAARIIT NE ROOG bible

Xa peƭit axe 23

¹O reerangaa o roon fo o kiin o maak, fat o and oxe reertoona.

²O xeexange sax oo, wañi a las of.

³Ba o yaaw xa tox xa pelu xe ten, yaam a mbaaga ndef mbog na wo.

⁴Baa o gind halal a jom’andong boo o ɓektin yiif.

⁵A kid of a ngaanangaa teen, ta naag mes, yaam halal o mat kaa saxaa a nafir, a yet fir farna fa asamaan nen a canjiik.

⁶Ba o ñaam no roon no xe na ɗeetang a ngid a pariƴ, too ba o yaaw xa tox xa pelu xe ten,

⁷yaam refee oxe foogtanoona. Kaa layang ee: «Ñaami boo giñ, yer boo xeƴ!» ndaa koy bugirang o ga.

⁸Xan o xuq ke ñaamoona, too fa lay fa mbelu fee wo ɗaxkee dara.

⁹Ba o lay no nof ke na fanxoy fee, yaam xan a xeef o jeg-yiif ole na fa lay of.

¹⁰Ba o riñ a tet ake mbiiseena yaaga, ndax o rok kam o qol no waan ole,

¹¹yaam o baawat den a jega doole too xan a farit a den mbaambir of.

¹²Letni xeeñ of na cangin ale, nof of, o wetan a den fa lay fee no and ole.

¹³Ba o jeg a yiif-a-ƭak no yar o ndeɓandoong onqe. O xawtangaan o loq, warkiran.

¹⁴Yaa o xawtan o loq ole, kaa o guutatirandan fa jaaniif.

¹⁵O ƥees, yaa o jegkaa yiif, xam felakinoox teen.

¹⁶Xan kam es a sawar, yaa o don of a layaa ke jofna.

¹⁷Ba o yaaw baabakaad we, ndaa fat o saɗar o Yaal oxe kili.

¹⁸Keene o njiriiñ of o feet oo, too yaakaar ne wo saalkee muk.

¹⁹O ƥees, nan-gilooxi, too xan o jeg yiif. Ɓakandi a qalaat of na ƭat a cofu le.

²⁰Ba o moof a ndeer no yeeyer we, mbaat a ndeer no we nquuñooxna na tegeƴ,

²¹yaam o yeeyer o say oxe fo xe xuuñooxna took o ndool a njofu, weene na nimaa, ndiiki da ndokook liir.

²²Nan-gilooxi a faap of fee rimoonga, too ba o xeef a ya of, yaa ta nogoyna.

²³Jiki ndigil ne, too ba o jikooxin, ten fo o jeg-yiif fo a cangin fo o ƴiƴ.

²⁴Faap fee no cofu xe kaa refaa no mbelakinax, oxe rimna o cegu yiif oxe a ref no ɗaay.

²⁵Yaasam faap of fa ya of a mbelakinoox, oxe ñootoonga a sawar!

²⁶O ƥees, dooni a koolax of na mi, sawar no reef a lalgand es.

²⁷A caga kaa ref gamb xooɗu, o tew o seeseeq a ref a ngas a ŋooɓu.

²⁸Kaa ɓengaa nen o ƭeg, soo a ɓekaa goor jaaku no ndamooxaƭar.

²⁹An genu na naƭtax fo na kaɓas? An na xasreel a taar o marin, a ɗomatooxaa? Ndi an na xaweel no kaa o leng a andeerna? Ndi an jegu a kid a yeeq?

³⁰We ngenna na yer njegun, we na ƥoonaa a yer a qaaɗu.

³¹Ba o ɗeet o yaxgel ole na biiñ fee na mirmirnaa kam a sak ale, a fel o yerel.

³²No ŋat a muuktan nen a fangool, a coptaa nen saamaand.

³³Yaaga xan a kid of a nga’aa xa andand, o layaa xa koɓong xa ƥor.

³⁴Xan a safong ee ndeer o maag wondooxo, ɗaapoox no jul a maaw.

³⁵Xan o laytooxaa yee: «Kaam xawel, ndaa dara ɗomiraam, um fadel, ndaa yegiim teen tig. A mban um yokooxkaa? Bugahinaam teen!»