Read NQAARIIT NE ROOG Xa peƭit axe 24 Bible Online

Xa peƭit axe 24 - NQAARIIT NE ROOG bible

Xa peƭit axe 24

¹Ba o yaaw soxodu we, too ba o bug o ref fa den,

²yaam kaa yuuɓaa yaq fa ƥor, fa lay den a gartaa paaxeer.

³O jeg-yiif na sinjaa mbind, o ƴiƴ a geennan.

⁴O and na taxaa tok ke a mayƭandtel kalal cegu njiriiñ pelu kuu ndefna.

⁵O yaal yiif kaa jeg katil, oxe jegna o and a may doole.

⁶Xire a kortax a yoontaa, aa-as mayu a ci’taa o ndam.

⁷O jeg-yiif ole kaa goƭood took na fanxoy fee. Ten taxu waree yaƥat o don um no nqel ne.

⁸Oxe na yuuɓaa paaxeer kaa xoyeel o caajaxasrand.

⁹Fanxoy fee, bakaad doŋ a xalaataa, o qaaxaadnax oxe a sibel a ndeer no wiin we.

¹⁰Boo gooyoona yaa fo coono ke, njambaar of ɗaxee tus.

¹¹Ɗofti wat we maaleena fa nqon, we na mbarkeel, o fexey da mbuusel.

¹²Ba o lay ee: «Keene haaliraam!» Ndax oxe na jaqtirandaa a qalaat ake ga’ee ke refna no xeeñ of? Ndax oxe na gayaa o ñis of andirang, ten fee na ɓoxotaa o kiin oo kiin a pi um?

¹³O ƥees, ñaami suum, yaam a fela lool, o ngoon onqe ten kaa saf lool no faƭanq of.

¹⁴Andi yee neene o jeg-yiif ole a nandu na wo. O jegangaan, o njiriiñ of o feet oo, too yaakaar of saalkee muk.

¹⁵Ba o nand nen soxodu we na ƥengaa no ngenand ne no cofu xe, a mbaytaa mbind um.

¹⁶O cofu xe a yenangaa boo a caf ɓetaa ƭaq sax oo, xan a inooxatin, soxodu we mat kaa njimbooxaa na taamaala.

¹⁷Ba o felakinoox yaam njom ne no pañ of, too baa kam of a fel, yaa ta tolofna,

¹⁸yaam ndik o Yaal oxe a ga’in, soo keene a feƭarin, fuux um a ɓoos no ten.

¹⁹Ba o fuux yaam we na mbi’aa paaxeer, too ba o yaaw soxodu we,

²⁰yaam o paaxeer oxe deyee yaakaar tig, o ñoow no soxodu we xan a nuk nen o lampa ñufu.

²¹O ƥees, saɗari o Yaal oxe fo o maad oxe. Ba o reer tig fo we na siiknooreel,

²²yaam taamaala xan a yen took den ndak fo ndak, too o leng andee a qaw ale o Yaal oxe mbaat o maad oxe a ndoonkaa a den.

²³Keeke refahinu ke jegu yiif we a layna: Fare-fare faaxee tus yaa fa hate fee.

²⁴Oxe na layaa oxe tooñna yee: «Jofaa», qeet ke kaa salooxan, a saax ake a mbuuxanin.

²⁵We na ngate’aa oxe tooñna mat, paax a nqottaa teen, a mbarke’el, a njegit teen baneex.

²⁶O doonanqol ndigil a jara xa anddiloor o mbeq axe fop.

²⁷Eeti jal a koƥ ale, xoox o qol of, soo sogkaa sak ƥasil.

²⁸Ba o seede’an o kend of na xa maaƥ. Ndax bugaa maaɓit o don of?

²⁹Ba o lay ee: «Xam fi’in ne ta fi’axama, ɓoxotin a pi um!»

³⁰Reefaam paam o qol feeñaak, paam a ƭing taxar biiñ no koor o ñaku xoox,

³¹ga o ndoxom onqe a xayaa muu refna, qooc ke a muur lanq ke fop, soo ɓit le fi’teena a ƥil a gaakoox.

³²Horooxaanum a paax, ɓek teen yiif es, xotit a cangin no ke ga’uuma.

³³Ɗaani bo ta felong, ñootnoox o ndik, letnoox, kongom xa ƥay of,

³⁴too yaaga ndool xan a betong nen o kuuɗ, o ñak a song o log of nen o koor o saqu ƥonax.