Read NQAARIIT NE ROOG Xa peƭit axe 26 Bible Online

Xa peƭit axe 26 - NQAARIIT NE ROOG bible

Xa peƭit axe 26

¹Ne nees a jagteerna kam ndiig mbaat a teƥ yaa fo a saxad, neene o niwel a jagteeru fa fanxoy fee.

²Ne ndiiƭ a waaslooraa, ne o helaar-roog a yettaa, neene a salax alaa saxeerna sen a nandu. Ɗaxee tus.

³Pis jegu o qiir, o faam a jeg a laxaaɓ, o loq o mat, ndiiñ ne na fanxoy fee jegun.

⁴Leek-leek ba o doonit a fanxoy fee o ƥodaxel um, yaam ndik o nand fo ten wo fa xoox of.

⁵Leek-leek doonti a fanxoy fee o ƥodaxel um, yaam ndik ta ɗeet a xoox um nen o cegu yiif.

⁶Oxe na lulaa a fanxoy kaa nand nen a caf um sax sax a ɗegaa, a ɓekaa a xoox um coono.

⁷Ne a caf a yerooxu a ñakitna doole, neene o feƭit no don fanxoy a nandu.

⁸Kañaa a fanxoy kaa nand nen o hiɓ gac no suusaand.

⁹O feƭit no don fanxoy kaa nand nen o kiin o bayu xaa na jeemaa ɗis ngiƈ no ɓay um.

¹⁰Oxe na xotaa no calel a fanxoy fuu ta daawna daaw kaa ɓekaa wiin we fop coono.

¹¹Fanxoy fee na jeepeetaa ƭooɗofir um kaa nand nen o ɓox olaa geleerooxanna ke ta xuqna.

¹²O xetangaa fo xaa na fi’ooxaa o cegu yiif, andi yee yaakaar a fanxoy moƴu o yaakaarin.

¹³Feeñaak fee kaa layaa yee: «Ƥaaɓaan ney na ƭat ale, njogoy njanglax ney no mbed ne!»

¹⁴Begax ne kaa wirlooxaa took sarñel ke ten, feeñaak fee a wirlooxaa took njong um.

¹⁵Feeñaak fee kaa ɓekaa o ɓay no roon ole, ndaa a tayla naq a luux.

¹⁶Feeñaak fee kaa foog ee ten moƴu o jeg yiif goor ɓetuu ɗik waa na ndoontaa o jeg-yiif.

¹⁷Oxaa rokna no nqasir naa a ƭat um a yongeerna kaa nand nen oxaa damna nof o ɓox.

¹⁸O ƭof oxaa na xaƴaa a kas akaa na kaƥaa, a mbaraa,

¹⁹neene oxe na naxaa o kend um, a layan ee «Kaam ŋasoogu rek» a nandu.

²⁰Xa cuuƭ a mbagangaa, fiɗel a ñuf, o ñuuñu a jegatangee, qasir a mbag.

²¹Gaagaañ kaa fi’aa fiɗel, o juuƭ a ɓaataa ƈulfaan, oxe na xasreel a gartaa ñimatir.

²²Fa lay fa yaayaq ƭool kaa xoƴig, a rokaa boo kam laaw ke.

²³Fa lay fa mbelu no don no soxodu xe kaa nand nen o ƥaxañ ƭok o soobte xaaliis.

²⁴Oxe na fañreel kaa layaa fa lay fa mbelu, too a soƥa fop naanaxir a fofu kam um.

²⁵Fa lay um a ɓuuɓangaa, ba o hoolooxin, yaam paaxeer ƥor a fofu no xeeñ um.

²⁶A ɗasnitangaa mbañir um o ƴiƴ sax oo, xan kañaan um a feeñ na kid no fop.

²⁷Oxe na waqaa gamb xan a yen teen, soo ɓil le a nomtooxiid took no xe na berengan.

²⁸O naanax oxe kaa hodaa oxe ta sibna, o don o yememaar a oraa a saŋkax.