Read NQAARIIT NE ROOG Xa peƭit axe 27 Bible Online

Xa peƭit axe 27 - NQAARIIT NE ROOG bible

Xa peƭit axe 27

¹Ba o fakooxan o feet, yaam andiro ke o feet a rimkaa.

²Fat o lakas a laasong, ndaa baa ref o don of. Fat a ref o kend of, ndaa baa ref ɗelem of.

³Ɓil le kaa naag dis, lanq ke a meɗ, ndaa ñoxole ne na fanxoy fee moƴu meɗ a den.

⁴Ngañak kaa yedin, fuux le a ref nen poofi kaa mbalna, naal koy, an waagun o xox?

⁵O soqanqol tafil moƴu nqaariit yememaar.

⁶Xaariit of a xawangaang, o fexong taxun, o pañ of o mat a lingangaang, kaa naxang.

⁷Oxe giñna tem, o diƈangaan suum sax, ta xañ, oxe xeexeena mat, ke xaaɗna sax kaa fel no ten.

⁸O kiin oxe na widaa maa goƭna mbind um kaa nand nen ndiiƭ naa goƭna ndaang um.

⁹Diwliin fa cuuraay kaa ndalnaa kam, o mbeq onqe na xaariit a nand nen qeeñe-xeeñe kaa moƴna o mbel.

¹⁰Ba o waas a xaariit of mbaat a xaariit faap of, too no njeeƈ coono of ba o ƴufan mbind no pog of, yaam o kentand o matu moƴu o pog o koƭu.

¹¹O ƥees, jegi yiif too xan o ɓutand kam es, yaaga xam waag o doon oxe na ŋañaxam.

¹²O kiin o qofu xe kaa ga’aa taamaala fee na garaa soo a woñin, oxe raƥna yiif o mat a suuraa rek soo a gomin.

¹³Boo o kiin a gadooxna o lad no kenar, jangi ndoki um. A gadooxangaa oxaa ta andeerna, sereen ta cooxong ngaasnit.

¹⁴Boo o kiin a falalooxna a xaariit um ƥiiɓ teel, a bug oo salanan barke, ndaa xan a ɗeetel nen a salax.

¹⁵Bomb laa na si’aa yaa fo a teƥ fo o tew o ƭaaɗangtax nandu,

¹⁶o harnan a ref o damaa nqeñ ne, mbaat o pok diwliin no ɓay of.

¹⁷Ne njelem a kaƭaactaa ngend um, neene o kiin a kaƭaactaa o kend um.

¹⁸Oxuu topatooxna ndun, a ñaam xa tim axaa, oxuu dagooxna o yaal mbind um a paax, a niwel.

¹⁹Boo ɗeetooxoona na foofi, o ga teen mukit of, o ɗeetangaa no kiin o lakas, o ga oxe refoona.

²⁰A semb ale jaaniif waagee may, a ngid no kiin a deyƭoox ne’aand.

²¹Xaaliis fa wurus kaa ƭeetloorteel fiɗel, o kiin o mat ne gon um a fodna a fodaa.

²²O soobangaa a fanxoy fee no faƥ, unandoorin fo pep ke sax oo, mbanxoy ne ten sambirkee fo ten.

²³Topatooxi a paax paal ke fo pambe ke wo, gaynaak a ked ake wo,

²⁴yaam halal naagee refaa boo kili, too maat mbaafkeer jegee.

²⁵Gubi daaƭ le na xa qol axe, too boo ta helko fo saqtaa, o gubtik na xa coong axe.

²⁶Yaaga paal ke xan a ñirong, a suk pambe ke, o jiktik a den xa qol,

²⁷fo sis ole no pambe ke a ñoowong, wo fo ƥasil of, a ñoow jeefeer we wo.