Read NQAARIIT NE ROOG Xa peƭit axe 28 Bible Online

Xa peƭit axe 28 - NQAARIIT NE ROOG bible

Xa peƭit axe 28

¹O soxodu xe kaa ƴufaa too raxkaand, o cofu xe mat a jeg o woor nen njogoy njanglax.

²Boo saax a siiknoorna fo o Yaal oxe a naaga o mayaa kelfa, ndaa a jegangaa o leng oxaa jegna yiif fo o and, maat ne kaa saƭkaa.

³O ndool onqaa na toroxandaa ñaatu we kaa ref nen mbuyaam naa na uupaa col.

⁴We na ƭapaa kebil ke kaa ndif’aa soxodu we, we na ngayaa kebil ke mat a mbuuxanaa a den.

⁵Wiin faaxeer we andee ke jofna, we na mbaaƭaa o Yaal oxe mat a anda fop.

⁶O yaal halal oxe na xotaa a ƭat a quƴooxu, o ndool onqe na ñaaƴaa no cofel moƴun.

⁷Oxe na gayaa kebil ke kaa ref o ƥiy o njegu yiif, oxe na yoonaa fo laawooxu we mat a sednooraa a faap um.

⁸Oxe na rimandaa halal um, ndax ta moƴ o may, kaa fokatanan oxe na yirmaa rool we.

⁹Boo o kiin a suxlooxna kebil ke no Yaal oxe, a qeƭ um sax kaa sednoox.

¹⁰Oxe na ɗooqlooxaa jofu we na ƭat a paaxeer xan a yen kam gamb le ta waqna, wooru we mat xan a lam o ɗaay ole.

¹¹O kiin oxe jegna halal kaa xalaataa yee a jega yiif, ndaa o ndool onqe ƴiƴna a anddilooxaan.

¹²Jofu we a maadooxangaa, fop kaa mbelakinooxaa, soxodu we a ndodooxangaa koy, oxuu refna a ɗasaa.

¹³Oxe na ɗasnaa tooñ um xeniɗkee, oxe na weejlaa pakaad um koy, a fes a den a cinj, xan a waasanel.

¹⁴Oxe na saɗaraa o fi paaxeer a ɗaaya, oxe na ŋajaa mat kaa yenaa na taamaala.

¹⁵O soxodu xaa na maadooxaa took xeet fa neewu doole kaa nand nen njogoy naa na bumbaa mbaat nen ursu naa xeexeena.

¹⁶O kelwaar oxe moƴna o ɓaataa lukit jegee yiif, oxe na fañaa a pi a paaxeer o mat kaa ɓaataa xa yeng um.

¹⁷Oxe warna o lakas kaa ƴufanaa fa nqon um. Ba o leng a xañtin o ten.

¹⁸Oxe na ñaaƴaa no cofel xan a gen no woor, oxe na ceek-ceeknaa na ƭat a ƭak o mat kaa yenaa na leng na den.

¹⁹Oxuu xooxna o qol um, a jeg ñaamel teyu, oxe na ƴufanaa xa koɓong o mat xan a xon o ndool.

²⁰Oxe woorna, kaa fop um a barke’aa, oxe na ƴufanaa halal o mat ñakkaand o xaw.

²¹Fare-fare faaxee tus. Yaag oo toox de, a jega waa na mbi’an yaam tig pooreer doŋ.

²²Oxe buge’na kaa gindaa halal too andee koy ee ndool na ɓeedan.

²³Oxe na soqaa o kiin moƴu gidmeel ee oxe na jalnge’aa.

²⁴Oxe na jaɓaa o jeg no we ndimuuna soo a lay ee: «Refee bakaad!» o yoon no guuɗ we yoo.

²⁵Oxe buge’na kaa oraa qasir, oxe gaɗna mbir um no Yaal oxe mat a neqaa.

²⁶Oxe ndigil um soom a giñna o ƭof oo, oxe na ñaaƴtaa o jeg-yiif o mat xan a gen no woor.

²⁷Oxe na ci’aa rool we naagee o roolaa, oxe na fañaa ɗeet a den o mat kaa salooxeel.

²⁸Soxodu we a maadooxangaa, oxuu refna kaa ɗasaa, a moocangaa koy, jofu we a naang gañ.