Read NQAARIIT NE ROOG Xa peƭit axe 31 Bible Online

Xa peƭit axe 31 - NQAARIIT NE ROOG bible

Xa peƭit axe 31

¹Fa lay fee Lemu’el fee o maad Maasa, ya um a jangnuuna.

²O ƥees, xar um laykang? Ndi xar um laykang a lay, wo o ƥees onqe rimooduuma? Xar um laykang, wo o ƥees onqe jegtuuma na qeƭ es?

³Baa rew a paang doole of, ba o xaƴ rew we na maafnooraa maad we a adnong.

⁴Wo Lemu’el, jagee no maad we, kaam ee maad we njagee muk fo a yer biiñ, ne’atiim gelwaar we a njag fo a yer a qaaɗu,

⁵yaam ndik da yer, a mbeecit kebil ke, boo a sufaal wargal no toroxu we fop.

⁶Cooxyo oxe na xonaa a yer a qaaɗu, biiñ fee, nu cooxin oxe jegna naqad no xeeñ um.

⁷Bo ta yeraa xan a weecit o ñaat ole ten, too wetandooxkatee coono ke ten.

⁸Yaƥati o don of ndax o xoxit o muum oxe, we ndeɓeena, o ɓoxot a den wargal den.

⁹Yaƥati o don of, hate fo o cofel, too xoxit wargal no toroxu xe fa fee no ndool onqe.

¹⁰Oxe jegna o tew o paax a ɗaaya, oxeene tew moƴu o jar xa peme.

¹¹O kor um kaa hoolooxan, too ñakkee dara no mbind um.

¹²O tew oxeene kaa fi’anan paax, ndaa fi’ankiran paaxeer leng no ñoow o ñis um fop.

¹³Kaa waaƭaa fale fa gaare, a jalaa fo xeeñ letu.

¹⁴Kaa nand nen a kaal a cula’ir, a ɓistiidaa koƭu ñaamel no mbind ne.

¹⁵Boo Roog a helko fo feedaa ta inoox, a coox we no mbind um ñaamel soo a las jeefeer we ten o far den.

¹⁶Kaa xalaataa o qol soo a jikin, a jimbaa a ƭing taxar biiñ fo o jeg um.

¹⁷Kaa jaltaa o jaflax, too naagee moofaa.

¹⁸Kaa yegaa yee fop um a ñaaƴa, too a yeng-yeng sax ta waaƭaa kaa ta jalna.

¹⁹O ɓay um kaa damaa a tuuy ale, qol ke ten a mbirlaa a sasam ale.

²⁰Kaa muƥtanaa o toroxu xe o ɓay um, rool we, ta letin a den a naax um.

²¹Saɗaranee we no mbind um a ƥuuɓ ale, yaam ƥasil um fop kaa ndokooxaa meɗu.

²²Kaa fi’anaa a xoox um kulooxel, a rokooxaa tikoorik pi’te gaare fo kaa yaxigna coy.

²³O kor um kaa niweel no nqel ne, yaa ta moofna fo maak we no saax le.

²⁴Oxeene tew kaa riwaa xa porok soo a jikoox a den, jula we, ta coox a den xa kumnoor.

²⁵Kaa jegaa doole fo o niwel soo a naqanaa o feet.

²⁶Kaa yaƥataa o don um fo o jeg-yiif, a cooxtaa xa as fo o paaxel.

²⁷Kaa yetooxaa ke na xewaa no mbind um, too mbeeñaak matkiran.

²⁸Xa ƥiy axe ten kaa ngaraa a layin ee: «Ɗaayaa!», o kor um a inoox a tagasin ee:

²⁹«Rew jaaku a njambaara, ndaa wo gartu a den fop took!»

³⁰O yaawnax no tew kaa naxaa, o mosel um a wataa, o tew oxe saɗarna o Yaal oxe doŋ jare o tagas.

³¹Saɗgiteenoo o rim ole no calel um, soo a pi ake ten a simatin no qel ke.