Read NQAARIIT NE ROOG O baawaare xe 1 Bible Online

O baawaare xe 1 - NQAARIIT NE ROOG bible

O baawaare xe 1

¹Keeke refu fa lay fee no Baawaare xe, o ƥiy Dawid, too a reeƭu o maad kam Yeerusaleem:

²Kasaara fee no kasaara ke! O Baawaare xe kaa tee: Kasaara fee no kasaara ke, fop kasaara yoo!

³Ke o kiin a ŋus-ŋusnaa fop ɗuga njeeƈ ne xar a ɗaxkan?

⁴Suk kaa mbaafaa, suk lakas a ngar, ndaa lanq ke mat kaa maadaa boo kili.

⁵Njeeƈ ne kaa wataa, a mudaa soo a tayaa o nomtoox no mbiñ onqe ta watitkahinaa.

⁶Nqeñ ne kaa jagnaa no ɓemb-roog o ñamaak, a puloox no ɓemb-roog o janoon, a wirlooxaa, a wirlooxatinaa, cinj kaaga ta jangatinik saawo fa leng kut fee.

⁷Xa quluɓ axe fop no maag ole a caarooxaa, ndaa taxee ta may. Poofi ke kaa ngen no nomtooxaa me xa quluɓ axe a nqaytaa nqayit.

⁸Tig oo tig kaa fasit. Fop waagaand o lay boo a fag, a ngid waagee deyƭoox na ƭeet, too nof waagee may na fa nan.

⁹Ke reeƭna reeƭ, ten na refkaa ref, too ke fi’eena, ten na fi’keel. Jegee qas leng ɗuga njeeƈ ne.

¹⁰A jegangaa kaa na layeel sax ee: «Ga’i kene, tig qas oo!», a mos’a o jeg no camaane ke adooxna a in yaaga.

¹¹Ke faafna yaaga wetandooxataand, too ke na xewkaa taa mbaambir naa wetandooxkaand me no we na ngarkaa a cinj um.

¹²Mi o Baawaare xe, reeƭaam o maad Isra’el kam Yeerusaleem.

¹³Ɗoftaam o waaƭ too horoox ndax um and fop ke na fi’eel ɗuga asamaan. Keene refu calel ƭomu ke Roog a gadinna xa ƥiy Aadama.

¹⁴Ga’aam fop ke na fi’eel took lanq ke. Yaag oo toox de fop kasaara yoo fo a ƥaaƈ a ƥor.

¹⁵Ke tuuƭooxna waagaand o jofand, too ke refeerna meen waagaand o limit.

¹⁶Layaam taa kam es ee: «Maaknaam soo xooɗin o and es, kupu sax we eetaxama o maadoox kam Yeerusaleem fop, too jegaam tigi o and fo o jeg-yiif.»

¹⁷Ɗoftaam o ɓaal ke refna o and fo o jeg-yiif, ƭof fo o ƥodaxel, ndaa ga’aam ee keene itam a ƥaaƈ a ƥor oo.

¹⁸Nuu o jeg-yiif ole a xooɗitna, a qalam ake a mayit neen, too nuu o and ole a magnitna, kam fa mbagu a naagit neen gañ.