Read NQAARIIT NE ROOG O baawaare xe 10 Bible Online

O baawaare xe 10 - NQAARIIT NE ROOG bible

O baawaare xe 10

¹Buƈ qonu ke kaa mbotandaa soo a ñolandaa diwliin fee no caajaxas qeeñe-xeeñe xe. Ƭof ndutuuñ a waaga ñuf o jeg-yiif tigi.

²Xeeñ le no cegu yiif oxe kaa ɓakandan me faaxna, le na fanxoy fee mat a ɓakandan me faaxeerna.

³Boo fanxoy fee a ñaaƴaa na ƭat sax, o jeg-yiif ole naagee refaa fo ten, too kaa lalaa fop ee fanxoy oo.

⁴Boo o maad oxe a fuuxanoonga, fodi o mbid, yaam o teylax a waaga tax ta waasanong sax o njuumte maak.

⁵A jega o njakad onqaa ga’uuma took lanq ke, ta ref o njuumte nqaa ɓostooxna oxe na maadooxaa:

⁶panxoy ke kaa ndoonel me moƴna o niwnoox, soo wiin maak we a payandel a lanq.

⁷Ga’aam faɗ took pis, soo gelwaar a ñaaƴaa nen faɗ.

⁸Oxe na waqaa gamb xan a yen teen, too oxe na baytaa o ɗiiɗing, xan fangool a ŋatin.

⁹Oxe na utaa a ƥil xan a gaañoox, too oxe na seɓaa xa cuuƭ, tig um wooree.

¹⁰Njelem ne a ɗukangaa too weel le lakaand, doole a laamtu ndax ta jaltel, too o jeg-yiif waagu tax o fadin o bug of.

¹¹O xaƴangaa boo fangool a ŋatong, xar o moof jatatan a ɗaxu?

¹²Fa lay fee no cegu yiif oxe kaa niwnooran, o don fanxoy fee mat a oraa a saŋkax um.

¹³Fa lay fee na fanxoy fee fop ƭooɗofir oo, a xotit no mberaandoong ne boo no muukandoong ne.

¹⁴Fanxoy fee kaa layaa a taar o marin, ndaa o leng andee ke na xewkaa. Ndi an na yeginkan ke na xewkaa a cinj um?

¹⁵Calel fanxoy fee kaa xijlan, ten fee andeerna a ƭat ale jofna na teeru faa.

¹⁶Ndaw o njakad no saax le o maad um a refna o fes o dutuuñ, too kelfa ke a nqesaa na ñaam.

¹⁷Saax le o maad um a refna o ƥiy garmi, soo kelfa ke a ñaamaa na waxtu um ndax da njeg doole, too refee ndax da mbay nep, a ɗaaya.

¹⁸Xa ƥay axe a yaafuusangaa, bomb le a juukoox a lanq, a mbeeñaakangaa, mbind ne a si.

¹⁹Mbumbaay kaa fi’eel ndax o felakinoox, biiñ a felnaa o ñoow, ndaa xaaliis na waagnooraa fop.

²⁰Ba o saloox o maad, baa ref no yiif of sax, too kam a ndok a pe’el of sax, ba o saloox o kiin o maak, yaam ndiiƭ ne na yetaa a waaga ɓis fangax le, ke jegna a nafir a jeepeet fa lay of.